Бірінші болып 7 шақырымдық жарыс жолына шыққан жорғалардың озып келген алғашқы 3-еуіне бәйге бұйырды. Бірінші орын Аякөз Бикенова баптаған Петропавл қаласындағы «Құлагер» атшабарының жылқысы «Филипс» есімді жорғаға, келесі орындар солтүстікқазақстандық Арман Қабдоллаевтың меншігі «Реванш» атты күлікке және Ақмола облысы Бұланды ауданының тұрғыны Фархат Жайлиев тізгіндеген «Эдельвейс» атты жорғаға бұйырды.
Келесі сын 9 шақырымдық құнан бәйгеге 24 жүйрік қатысып, бірінші орын Алматы облысы Жамбыл ауданынан келген Сұлтан Жоланұлының жүйрігі «Талхиз» атты торы байталдың маңдайына жазылса, екінші орын Сүлетай Нұрболат тізгіндеген «Бабур Амир» есімді құнанға, үшінші орын Алматы қаласының тұрғыны Олжас Әбдіхамит баптаған «Заманай» атты ағылшын жылқысына бұйырды.
Одан кейін кіші аламан, яғни 16 шақырымдық топ бәйге жүйріктері жарыс жолына шығып, ауыздығымен алысқан 27 сәйгүліктің ішінен Алматы облысының Қарасай ауданынан әкелінген «Қарлығаштың» (иесі – Секенай Бөбекбай) маңдайы жарқырап бірінші келсе, одан кейінгі орындарды Маңғыстау облысының тұрғыны Шадрах Ермекбайұлының «Ақшолпан» атты торы биесі мен Алматы облысының Жамбыл ауданынан келген Сұлтан Жоланұлының таза қанды қарагері бөлісті.
«Бәйгенің көркі – аламан» дегендей, 25 шақырымдық жарыс жолына әр тараптан қосылған 31 жүйрік бағын сынады. Бұлардың арасында үлкен бәйгелерден бәс алып жүрген Қарағандының «Бақторысы», Алматының «Қараторғайы» мен «Нұртөбелі», Нұр-Сұлтанның «Бұйрығы», Оралдың «Бекторы», Жамбылдың «Нұрисламы», Алматы облысының «Жетісуы», Павлодардың «Сенімі» сынды бас жүлдеден дәмелі сәйгүліктер қара жердің апшысын қуырды. Сонымен алғашқы болып тізгін ұстатқан 7 жүйрікке жүлде берілді.
Бірінші орын Мейірлан Нұрболатов тізгіндеген «Бақторы» атты жүйрікке бұйырды. Ат иесі – Парламент Мәжілісінің депутаты Бекболат Тілеухан. Екінші орынды Алматы облысының Қарасай ауданынан келген таза қанды бес жасар күрең бие еншіледі. Иесі – Мәди Оразалиев. Үшінші орынға Нұр-Сұлтан қаласының атынан шыққан таза қанды торы дөнен табан тіреді. Ат иелері – Нұрдәулет Әкімжанов пен Азамат Бегалин.
Келесі орындар Алматы облысындағы Қарасай ауданының тұрғыны әйгілі атбегі Секенай Бөбекбайдың «Үшқоңырына», Қарағанды облысының Қызылжар стансасынан келген Бекзат Әйнекбаевтың күрең қасқасына, көмбені кесіп өтіп жығылған Ержан Ақтасовтың «Көкойнағына» және Алматы облысындағы Қарасай ауданынан келген Сұлтан Жоланұлының «Асу торысына» бұйырды.
