ҚазҰМУ-дың Даңқ залына академик Төрегелді Шармановтың есімі берілді

Руханият • 22 Қазан, 2020

ҚазҰМУ-дың Даңқ залына академик Төрегелді Шармановтың есімі берілді

46 рет көрсетілді

С.Ж. Асфендияров атындағы Қазақ ұлттық медицина университетінің Даңқ залына академик Төрегелді Шармановтың есімі берілді, деп хабарлайды Egemen.kz.

Эльвира СЕРІКҚЫЗЫ

Бұл академиктің сіңірген еңбегіне, денсаулық сақтау саласына қосқан зор үлесіне деген құрмет. Қазақстандық медицинасының корифейі — Төрегелді Шарманов өзінің 90 жасында тынымсыз еңбек етуде. Ол Қазақ тағамтану академиясына маңызды өзгерістер енгізуде. Ол сондай-ақ С.Ж. Асфендияров атындағы ҚазҰМУ-дың құрметті профессоры болып табылады. Академик Шарманов өзінің тәлімгерлік миссиясын еш ұмытпай, жас мамандарды даярлауға көп көңіл бөледі. Академик Төрегелді Шарманов 90 жасқа келсе де, халқының игілігі үшін еңбек етуді мақсат етеді.

ҚазҰМУ Төрегелді Шармановтың альма-матері. Төрегелді Шарманов 1947 жылы 17 жасында университеттің есігін алғаш ашқан болатын. Дәл осы залда академиктің алғашқы дәрістері өтті. ҚазҰМУ-дың Даңқ залы – 90 жылдағы қазақстандық медицинаның мақтанышы мен жетістіктері шоғырланған, маңызды отырыстар мен жиналыстар өткізілген университеттің негізгі залдарының бірі.

Төрегелді Шармановтың Қазақстан ғылымына қосқан үлесі зор. Академик әлі күнге дейін жас мамандарды тәрбиелеп, ел игілігі үшін тынымсыз еңбек етуде. Есімі бүкіл дүниежүзіне мәлім академик Төрегелді Шармановты ХХ ғасырдағы денсаулық сақтау саласының айтулы оқиғасы болған Алматы конференциясының ұйымдастырушысы ретінде біледі. Төрегелді Шарманов қазақ медицинасының қалыптасу мен даму жолында айтарлықтай еңбегi сiңген ғалым.

ҚазҰМУ – бұл еліміздің дәрігерлерді дайындаудағы үздік альма-матері. Өзінің 90 жылдық бай тарихында университеттен 100 мыңға жуық дәрігер түлеп шықты. Еліміздің әрбір үшінші медицина қызметкері біздің университеттің түлегі болып табылады.

ҚазҰМУ тек жетекші медициналық университет қана емес, сонымен қатар Қазақстанның жетекші ғылыми орталықтар мен ғылыми-зерттеу институттарын біріктіретін ғылыми орталық болып табылады. Бүгінгі таңда университет қазақстандық білім беру рейтингтерінде жетекші орында.

Медицина мамандарының ұстаханасына айналған ҚазҰМУ-да бүгінде 10 мыңға жуық студенттер, интерндер, резиденттер, магистранттар мен PhD докторанттары білім алады. Олардың арасында 19 елден келген 1200-ден астам шетелдік студенттер бар. ҚазҰМУ түлектері әлемнің 17 елінде жұмыс істейді. Университетте 7 мектеп пен факультет бар.

С.Ж. Асфендияров атындағы ҚазҰМУ-да Қазақстанның белгілі ғалым-педагогтары, ҚР Ұлттық Ұлттық ғылым академиясының, Ресей медициналық ғылымдар академиясының, ҚР Профилактикалық медицина академиясының, Халықаралық акадамиялардың академиктері, еңбек сіңірген ғылым және білім қайраткерлері, еңбегі сіңген дәрігерлер мен фармацевтер қызмет етеді.

АЛМАТЫ

Күннің маңызды және өзекті жаңалықтарын «Егемен Қазақстан» телеграм каналынан оқыңыз