Қазір жанармай бекеттеріндегі ұзын-сонар кезектен көз сүрінеді. Күні бұрын таллон алғандарға ғана көгілдір отын босатылуда. Қалғандары әйтеуір бір келіп қалар деген дәмемен тосуда.
– Кеше түнде баға бірден өсті. Әуелі литрі 57 теңге болған, қазір 80 теңгеден сатылуда, – дейді қала тұрғыны Бағлан Әміржанов, – соның өзінде таптырмайды. Әйтсе де, жанармайдан арзан ғой деп амалсыздан аласың. Дәл осындай қысылтаяң кезде пайда табуды көздейтін кәсіпкерлердің пиғылы алаңдатады.
Кейбір жанармай бекеттерінде газ мүлдем жоқ. Ондағы қызметкерлер газ іздеп келген қала тұрғындарын кері қайтарып жатыр. Біз сөйлескен қала тұрғыны Қоныс Есеевтің айтуына қарағанда, уақтылы ас-су дайындаудың өзі мұң болып қалған. Автокөлігі газбен жүретіндердің өкпесі қара қазандай. Осындайда жорамал айтатын «көріпкелдердің» пікіріне қарағанда, газ бағасын өсіру үшін жасалып жатқан амал-мыс. Газ құю бекетіндегілер де көгілдір отынның аяқастынан жоқ болып кетуінің нақты себебін түсіндіре алмайды.
– Жеңіл автокөліктерге алдын ала талон алып қойғандарға газ құюға міндеттіміз, – дейді газ құю бекетінің өкілі Талғат Әлібаев, – олар алдын ала ақшасын төлеп қойды ғой, құймауға хақымыз жоқ. Қазір облысқа келетін көгілдір отынның дені элеваторлар мен қоймаларға астық кептіру үшін жөнелтіліп жатыр. Ол да өте маңызды шаруа ғой.
Егер мәселе уақтылы шешімін таппаса, жағдайдың ушығып кетуі де мүмкін. Жауапты мекеме басшылары бір-бірімен уәделесіп қойғандай бір ғана жауап айтуда.
– Жағдайдың осылай қалыптасуына зауыттардағы жөндеу жұмыстарының созылып кетуі себеп болып отыр. Қыркүйек айында басталған жұмыс әлі де жалғасуда. Қашан аяқталатыны белгісіз, – дейді облыстық энергетика және тұрғын үй-коммуналдық шаруашылығы басқармасының бөлім меңгерушісі Жасқайрат Садықов.
Көпшілікті әуре-сарсаңға салған көгілдір отын тапшылығы қашан жойылатындығын ешкім тап басып айта алмайды. Онсыз көсегеміздің көгермейтіні белгілі болып отыр.
КӨКШЕТАУ
