Марапаттау рәсімінде жобалары үздік деп танылған 22 белсенді жас 300 000 теңгенің иегері атанды. Шара шымылдығын дәулескер күйші Ардаби Мәулетұлы ашып, құттықтау сөзді филология ғылымдарының докторы, дипломат, экс-сенатор Әділ Ахметов алды.
Гранттар конкурсының марапаттау рәсіміне Нұр-Сұлтан қалалық Жастар саясаты мәселелері басқарма басшысы Дәулет Кәрібек, «Асыл адам» қайырымдылық қорының президенті Айнұр Сүлкеева, Ұлттық музейдегі «Халық қазынасы» бөлімінің басшысы Ақан Оңғарұлы, Ұлттық музей директорының орынбасары Айбар Қасенәлі, ақын, Жазушылар одағының мүшесі Ұларбек Дәлей, «Ұлттық волонтерлік желісі» республикалық ұйымының координаторы Айсұлу Жұмашова қатысып, 22 жеңімпазға ақжарма тілектерін арнап, сәт-сапар тіледі.
Шара барысында Қазақ ұлттық өнер университетінің түлектері Мақпал Дүйсен мен Ернар Мұхамед әсем әндерімен қонақтар көңілін көкке жеткізді. Шара ұйымдастырушысы «Адырна» ұлттық-этнографиялық бірлестігінің басшысы Арман Әубәкірдің мәлімдеуінше, комиссия оқушы, студент жастар мен әлеуметтік топтарға білім беруге бағытталған, мүмкіндігі шектеулі адамдарды қолдауға арналған, медициналық бағыттағы және карантин кезінде іске асырылатын, жастар белсенділігін дамытуға арналған жобаларға ден қойған. «Мемлекеттен 22 жеңімпазға бөлінген қаражат волонтерлердің өз жобаларын іске асыруға және жоба аясында қоғам әлеуетін көтеруге бағытталды», деді А.Әубәкір.
