Бизнес саласы digital-маркетингке неге мұқтаж?

Digital маркетинг деген не?

Цифрлы маркетинг бұл әр­түр­­лі цифрлы тактиканы, құрал­дар­ды және байланыс арналарын қолдана отырып, әлеуетті тұты­нушылармен, өз уақы­ты­ның көп бөлігін интернетте өткі­зетін мақ­сатты аудиториямен бай­ла­нысуға ар­нал­ған маркетингтік іс-шаралар жиын­­тығы. Ал бұл жиынтық барлық са­ла­­да ауадай қажет екені де заман шын­дығы.

Digital маркетинг тақырыбына енетін бірқатар тактика мен құ­рал бар. Бұл компанияның веб-сайтының өзі және маркетингтің цифрлы арналары, интернет-жарнама және тұтынушыларды сатып алу арналары – SEO, электронды e-mail маркетингі, сатылым нүктесі, контент-маркетинг, тизер жарнамасы, SMM сияқты мәлім де беймәлім құралдардан тұрады.

Әртүрлі цифрлы маркетингтік арналарды қолданатын бизнес мақ­сатты аудиториямен анағұр­лым тиімді және уақтылы өзара әре­кеттесу мүмкіндігіне ие. Сол арқы­лы жаңа клиенттердің санын және брендке аудиторияның қы­зы­ғушылығын арттырады. Бұған бай­ланысты халық арасында «затты қара­па­йым адам сатса – тауар, маркетинг жа­саса – топ-тауар» деген сөз де жиі ай­тылып жүр.

Іздеу жүйесін оңтайландыру (SEO)

Бұл интернет маркетингтегі басты құрал. Іздеу жүйесін оңтай­ландыру (seo optimization) тұлға­ның, сайттың, компанияның, тіпті әлеуметтік желідегі жеке ак­каунтты іздеу нәтижесінде ті­зімде бірінші тұруға, жоғары по­зиция­лар­ға ие болуға көмектеседі. Бұл трафикті арттырады. Ал трафик – сұраныс пен сатылым көлемін арттырады.

SEO құралдары:

- Веб-сайттар;

- блогтар;

- инфографика.

Маркетинг контенті

Бұл термин брендтің танымал­ды­лы­ғын арттыру, трафиктің өсуі, мақсатты аудиториямен бай­ланыс, жетекші позициялар туды­ру және жаңа клиенттерді тарту мақсатында жасалатын кон­тент құруды және ілгерілетуді біл­діре­ді. Контент-маркетинг – ин­тер­неттегі бизнесті алға жыл­жы­тудың ең тиімді және әлі бағалан­баған құралдарының бірі. Инста­грам желісін аша қалсаңыз, «мә­тін жазып байып кет» дейтін жарнамашылардың көбейгені контент арқылы маркетинг жасауды үйретеміз дегені.

Контент-маркетинг стратегиясын жүзеге асыруға арналған арналар:

- блог жазбалары;

-электронды кітаптар мен мақа­ла­лар;

- подкасттар;

- блогтар;

- инфографика;

- онлайн кітапшалар мен каталогтар.

Әлеуметтік желідегі маркетинг

Әлеуметтік желіге барлығы­мыз тір­кел­­генбіз. Тәуліктегі уақы­тымыздың басым бөлігі желі­де «жасыл белгі» беріп отырамыз. Ал мамандар осы «пайдасыз» оты­рыстан да пайда табуға бола­тынын айтады. Маркетингтің бұл түрі сіздің жеке брендіңізді де, биз­несіңізді де әлеуметтік медиада жар­намалауға бағытталған. Бұл – өзгелердің сіздің бренд туралы хабардар болу аясын арттыру, трафикті көбейту және же­текші позициялар жасау үшін қол­да­нылатын құрал. Түптеп келгенде желі қолданушылары өз бренді үшін жұмыс істеп жүргенін өзі байқамауы да мүмкін. Өйткені күн са­йын жариялайтын суретті жазбалардың өзі де дұрыс қолдана білгенге орасан зор жарнама. Тек шегін ұмытып қалмау маңызды.

Әлеуметтік медиа маркетинг (SMM) пайдаланатын арналар:

- Facebook;

- Twitter;

- LinkedIn;

- Instagram;

- Snapchat;

- Pinterest.

- Интернет кез келген бизнес түрінің өсуі мен дамуына шексіз мүмкіндіктер ұсынады. Тіпті 100% офлайнда жүргізілетіндей болып көрінген кәсіптің өзін интернет арқылы жандандыруға болатынына көптеген дәлел бар.

Егжей-тегжейлі сараптама және кең аудиторияны қамту мүм­кіндігі шек­­сіз сандық маркетингтің жалпы ар­тық­шылығы да осында. Әртүрлі сала­лардағы компания­лар мұны іс жү­зінде дәлелдеп келеді. Мәселен, lafounder.com ба­сылымының маркетолог маман­дары­ның айтуынша, цифрлы мар­кетингтің негізін түсініп, оның не екенін біліп, негізгі цифр­лы мар­кетингтік арналардың қа­лай жұ­мыс істейтініне көз жеткізе отырып, кез келген адамға интернетте өз бизнесін тиімді ілгерілетуге көмектесетін, өзіндік бренд қалып­тастырып, сан қырынан таныта алатын стратегия жасау оңай.

Олар халыққа «Осы құ­рал­дарды өз бизнесіңізде әлі қол­дан­бай­тын болсаңыз, онда тәсіл­де­ріңіз­ді қайта қарау туралы ойланып, дәл қазір бастаңыз», деген үндеу де тастады.

Мамандар цифрлы телевизия мен көшедегі жарнама баяғыдай әсер ет­пей­тінін, оның орнын дижитал гад­жет­тердегі сан мың маркетингтік амалдар басатынын, басып та қойғанын айтып жүр.

Десе де, қалада, жылы үйде отыр­ған маркетологтарға айта салу оңай шығар? Оған шалғай елді­мекен­дер­дегі отан­дас­тар­дың интернетке қол­же­тім­ді­лі­гі қам­тамасыз етілсе деңіз... Әйтпесе бәрі бекер-ау?!