Ведомство өкілдерінің айтуынша, кезекке қатысты мәселе шешімін тапқан көрінеді.
"Әлеуметтік желілерде, мессенджерлерде Өскемен және Семей қалаларының тұрғындары зертханаларда уақытылы ПТР-тест тапсыра алмағаны туралы хабар тарады. 2020 жылдың 2 қарашасында сағат 12:00-ге дейін осындай жағдайдың болғаны рас. Шығыс Қазақстан облысының тауарлар мен қызметтердің сапасы мен қауіпсіздігін бақылау департаменті бұл проблеманы реттеп, кезекке қатысты мәселені шешті", дейді департамент өкілдері.
3 қарашадан бастап қосымша екі зертхана ашылады. Жалпы Шығыс Қазақстан облысында 10 клиника зерттеу жүргізеді.
"Облыс бойынша 298 547 зерттеу жүргізілді. Орта есеппен күніне 2000-2200 зерттеу жасалады", дейді ұйым өкілдері.
Айта кетейік, бүгін Семейдегі ПТР-тест зертханасының алдында ұзын-сонар кезек пайда болғаны туралы хабарланды. Зертханалардағы жағдай көліктегі бас мемлекеттік санитар дәрігердің қаулысы шыққаннан кейін басталған көрінеді. 2 қарашадан бастап шығыс қазақстандықтарға жолаушылар пойызы мен ұшаққа ПТР-тестінің нәтижесі болмаса, өңірден шығуға тыйым салынған.
