Денсаулық сақтау министрлігінің мәліметі бойынша қазіргі уақытта коронавирус инфекциясынан 4 489 адам ем қабылдауды жалғастыруда. Олардың арасында 333 бала бар. Стационарларда 2 420 науқас жатыр. 2 069 адам амбулаториялық жағдайда емделуде. Жалпы науқастардың арасында 150 адамның ахуалы нашар. Соның ішінде 15 науқастың ахуалы аса ауыр деп бағалануда. 22 науқас өкпені жасанды желдету аппаратында жатыр.
Министрлік бұдан былай тәуліктік нәтижелер туралы ақпаратты үзбей жариялап отырады. Барлық мәлімет ресми сайтта және ведомствоның әлеуметтік желілердегі парақшалары арқылы таратылады. Атап айтқанда, науқастардың жалпы саны жөнінде, қайтыс болу деректері туралы және де қоғам үшін маңызды ахуалдың барлығы ресми ақпарат тарату көздерінде жедел жарияланып тұрады.
Өткен тәулікте 442 адамда коронавирус індеті ПТР арқылы расталған. Аймақтар бойынша тарқатып айтсақ, Нұр-Сұлтан қаласында – 28, Алматы қаласында – 21, Ақмола облысында – 27, Ақтөбе облысында – 4, Алматы облысында – 2, Атырау облысында – 3, Шығыс Қазақстан облысында – 245, Жамбыл облысында – 3, Батыс Қазақстан облысында – 13, Қарағанды облысында – 16, Қостанай облысында – 13, Маңғыстау облысында – 2, Павлодар облысында – 30, Солтүстік Қазақстан облысында 35 адамнан анықталған. Жалпы ел бойынша ауырғандар саны – 112 860.
Бұл бар болғаны сандар деп салғырт қарап, науқастардың көбейіп жатқанын естісе де немқұрайлылық танытып, бейғам жүргендер жетерлік. Күн сайын газет-журналдардан бөлек, радио мен телеарналардан дамылсыз ескертулер жасалып жатса да, басына түспей бағынғысы келмейтіндер қаншама?!
Аталған індеттің алдын алу үшін республиканың кейбір аймақтарында санитарлық бекет жұмысын бастайды. Дәлірек айтсақ, Қарағанды облысында коронавирус бойынша эпидемиялық жағдайды тұрақтандыру үшін 4 қарашада түнгі сағат 12.00-де сыртқы шекараларға кіруді/шығуды бақылау үшін үш санитарлық бекет орнатылады.
Сондай-ақ осы бекеттер арқылы жүріп-тұруға рұқсат беру үшін propusk.kz порталын іске қосу жоспарланып отыр. Елде аурудың өсуіне байланысты алдын алу шарасы ретінде келесі бағыттар бойынша санитарлық бекеттер орнату туралы шешім қабылданған. Бірінші, Қызылорда – Павлодар автожолы (Молодежный кенті маңында, екінші, Павлодар – Баянауыл – Бұқар жырау – Қарағанды автожолы (Үміткер кенті маңында), үшінші, Қарағанды – Аягөз – Бұғаз автожолының 271-ші шақырымы, Семей қаласы бағытында (Кентөбе кенті маңында) санитарлық бекет жұмысын бастайды.
Санитарлық бекеттер арқылы өтуді қарастыратын сапарларды жоспарлағандар propusk.kz сайтында өз деректерін көрсетуі керек. Аталған бағыттар бойынша құқық қорғау органдарына, медицина қызметкерлері мен арнайы қызметтерге, халықтың тіршілігін қамтамасыз ету ұйымдарының қызметкерлеріне, жүк көліктеріне, транзиттік көліктерге, Қарағанды облысына жергілікті тіркеумен келетін адамдарға, емделуге келетін адамдарға рұқсатнамасыз жүріп-тұруға рұқсат етіледі. Вахталық жұмыскерлер мен тұрғылықты жерінен жұмыс орнына дейін және кері қарай жүретіндер өз деректерін propusk.kz сайтына жіберуі қажет.
Санитарлық бекеттерде полиция қызметкерлері мен дәрігерлер кезекшілік етеді. Олар жүргізушілер мен жолаушылардың денсаулық жағдайын тексереді. Бақылау барысында термометрия мен сауалдама жүргізіледі.
Сонымен қатар 1 қарашадан бастап Шығыс Қазақстан облысында үйден кез келген жаққа шығу үшін маска тағу керек. Бұл туралы облыстың бас санитарлық дәрігерінің 29 қазандағы №23-1 қаулысында айтылған.
«Үйден қайда шықсаңыз да, көшеде болсын, өз көлігіңізде, кіреберісте болсын, маска тағу міндетті. Яғни масканы үйіңіз немесе пәтеріңіз болып саналмайтын кез келген жерде тағу керек. Қалған тыйымдар жаппай мерекелер мен отбасылық отырыстар үшін де жалғасуда. Осы санитарлық ережені сақтамағаны үшін айыппұл 30 АЕК (80 000 теңгеден жоғары) құрайды. Мұның орындалуын полицейлер қадағалайды. Олар хаттамалар толтырады, бірақ айыппұл сала алмайды. Сондықтан оларды Тауарлар мен көрсетілетін қызметтердің сапасы мен қауіпсіздігін бақылау комитетінің санитарлық дәрігерлеріне жібереді», делінген қаулыда.
Ел аумағында коронавирус инфекциясының таралуын болдырмау жөніндегі ведомствоаралық комиссияның шешіміне сәйкес Шығыс Қазақстан облысындағы бірқатар бағыттағы жолаушылар пойызының маршруттары қысқартылды.
«Жолаушылар тасымалы» АҚ баспасөз қызметінің мәліметіне сүйенсек, жолаушылар пойыздарының қозғалыс кестесіне бірқатар өзгеріс енгізілді. Атап айтқанда, қарашаның 2-сінен бастап «Павлодар-Алматы-2» бағытындағы пойыздың Дегелең, Семей, Жаңа-Семей, Шар, Жаңғызтөбе, Жарма, Үшбиік, Аягөз, Ақтоғай стансаларында жолаушыларды отырғызуға және түсіруге тыйым салынады. «Алматы-2-Өскемен-1» пойызы бұрынғыдай күн сайын емес, күнара жүретін болады. Сонымен қатар «Нұр-Сұлтан – Нұрлы Жол – Өскемен-1» пойызы күн сайын емес, аптасына бір рет қатынайды.
Шығыс Қазақстан облысының барлық стансаларынан түсетін жолаушыларда тапсырылғанына 3 күннен аспаған COVID-19 инфекциясын жұқтырмағандығын растайтын сынама нәтижесі болуы керек. Осыған дейін пойыз билетін сатып алғандар ақшаларын қайтара алады. Жолаушылар пойыздарының жүру кестесі туралы барлық ақпаратты «105» нөмірі бойынша біле алады. Тұрғындарға коронавирус пандемиясы кезінде дерттің таралуының алдын алу мақсатында қабылданған шараларға түсіністікпен қарауға шақырамыз.
Әлемнің қай елін алып қарасаңыз да ахуал мәз емес. «Сүрініп жатып жығылғанға күлетін» жағдайда емеспіз. Екінші толқын есігімізден әне-міне енетіндей елең-алаң күйде отырғанымыз анық. Дей тұрғанмен саулыққа салғырттық танытып, шалдыққандарды көрсе де шарасыз отырған қандастарымыз қаншама. Ұшаққа мінсең де, автобусқа кірсең де, көшеде жүрсең де санитарлық талаптарға мән бер. Бетперде ки. Өзіңді сақта. Жақыныңа жанашыр бол.
