Суреттерде: полиция майоры Руслан Бекболатов; учаскелік инспек- тор Қадырбек Исин
Учаскелік инспектордың беделін арттыру үшін оларға жоғары билік, атап айтқанда Ішкі істер министрлігі тарапынан қолдау жасалуы керек-ақ. Әйтпесе, құқық қорғаудың тек қара жұмысымен ғана айналысатын жандар көзге іліне қоймайды. Президент Жолдауындағы талаптан кейін министрлік тарапынан осы іске мән беріле бастады. Соның бірі ретінде министрдің өзі қатысқан жиындарға олардың шақырылуынан көруге болады. Жуырда солтүстікқазақстандық учаскелік полиция инспекторы Руслан Бекболатов ІІМ кеңейтілген алқасында өзіне мерзімінен бұрын берілген майор атағын министр, генерал-лейтенант Ерлан Тұрғымбаевтың өз қолынан алды. Алқа отырысына Президент Қасым-Жомарт Тоқаевтың өзі де қатысқан еді. Отырыста учаскелік инспекторлардың алдында тұрған міндеттер айтылып, жаңа талаптар жеткізілді. «Бұл атақ мен үшін айрықша болды. Министрдің өз қолынан погон алғанда қуаныштан қатты толқыдым. Осы отырыста біздің қызметіміз үшін жаңа мүмкіндіктер ашылғанын білдік. Басты міндетіміз – қылмыстардың алдын алу. Енді біздің функциямызға жатпайтын басқа жұмыстар бізге жүктелмейтін шығар деген үміттеміз», деді ол өзінің сөзінде.
Руслан Бекболатов Тайынша ауданы Абай ауылдық округінде учаскелік инспектор болып қызмет істейді. Учаске халқының саны 1400-ге жуық адам. Жыл басынан бері мұнда төрт ұрлық жасалып, олар Руслан Бекболатовтың қатысуымен барлығы ізі суымай ашылды. Оның ұстанымы – учаскелік полиция инспекторлары өзінің учаскесін толықтай білуі тиіс.
Учаскеде түрлі оқиғалар болып тұрады. Бірде оған әкесін ұрып жатқан бұзақыны ұстауға тура келді. Ішімдікке тойып алған баласының қолында пышақ болған. Р.Бекболатов оған қарамай қаскүнемнің қолын қайырып, пышақты тартып алған. Бірақ осы бұзықтың ауыл шаруашылығы кәсіпорнына жұмысқа қабылдануына да көмектескен. Қазір ол Р.Бекболатовты көргенде кәдімгідей қуанып қалады. «Полицияның міндеті – адамдарға көмектесіп, қолдау көрсете отырып, құқықтың бұзылуына жол берілмегенін қадағалау. Алқа отырысында адамдарды біржақты кінәлауға жол берілмеуі керектігі айтылды», дейді полиция майоры.
Жалпы, аталған отырысқа Солтүстік Қазақстан облысынан үш үздік учаскелік полиция инспекторы қатысты. Олардың қатарында болған учаскелік полиция инспекторы, полиция майоры Қадырбек Исин Мамлют ауданындағы Пригородный селолық округінде қызмет етеді. «Мен жиыннан өмір бойыма жетерлік әсер алдым. Әсіресе учаскелік инспекторлардың қызметтік міндеттерін жетілдіру бойынша айтылған ұсыныстар менің де ойымнан шықты. Соның ішінде бізді өзімізге тән емес міндеттерден босату мәселелері өте орынды деп санаймын. Біздің міндетіміз қызмет көрсететін аумақта қылмыстың алдын алу бола тұра, кез келген жұмыстарға бізді жегу әдетке айналған. Мысалы, әскерге шақырушыларды комиссариатқа жеткізу мен басқа да міндеттерді орындаудан біздің қызметті босату ұсынылды», деген ойымен бөлісті полиция майоры.
Учаскелік инспекторлардың күтетін жаңалықтарының арасында тұрмыстық зорлық-зомбылықты болғызбаудың жолы болып табылатын ресімдерді оңтайландыратын заңнамадағы өзгерістер. Биыл Қадырбек Исинге отбасылық жанжалға қатысты 7 істі сотқа дайындауға тура келген. Мұндай жұмыс бірнеше күнге созылады, кейде зая кететін жағдайлар да болады. Өйткені әйелдері жұбайларының уәделеріне сеніп, жазған арыздарын кері қайтарып алады. Отырыста отбасындағы зорлық-зомбылық фактілері бойынша татуластыру рәсімі мен ескерту түріндегі әкімшілік жазаны алып тастау ұсынылған. Сондай-ақ мұраға қалған тұрғын үйдің құжаттарын ресімдеу, күйеуімен ажырасу ресімі, өзге де бірнеше мәселелер бойынша учаскелік инспекторға функционалдық міндетінен тыс жұмыстар жүктеледі екен. Пригородный селолық округінде 1043 адам бар, барлығында да құқықтық мәселелер туындауы мүмкін, әр жағдайға түсіністікпен қарап, ауылдықтарға көмектесуге тырысу қажет деп санайды Қадырбек Исин.
Солтүстік Қазақстан облысы
