Мәселен, былтыр Гагарин кубогы жолындағы бәсекеде алғашқы кезеңде Магнитогорскінің «Металлург» клубын 4:1 есебімен жеңіп, жарыс жолынан шығарып жіберген-ді. Екінші айналымда Сібірдің «Сибирь» командасымен бақ сынауы керек болатын. Алайда коронавирус пандемиясына байланысты бүкіл жарыстар тоқтатылып, ҚХЛ тарихында бірінші рет жеңімпаз команда анықталған жоқ.
Өкінішке қарай, биыл «Барыстан» былтырғыдай қарқынды байқай алмай отырмыз. Жерлестеріміздің биылғы турнир кестесінде жоғары орыннан көрінуі былай тұрсын, тіпті үздік 8 клубтың қатарына іліне алмай қалама деген күдік басым болып тұр. Бірақ сол күдікті «Барыстың» кейінгі екі жеңісі аз болса да сейілткендей. Әйтпесе жеңілістен көз ашпай келе жатқан команда өз ойынын енді тапқандай. Елордада өткен алғашқы бәсекеде «Барыс» Қытайдың «Куньлунь» командасынан 2:1 есебімен басым түссе, кейіннен Риганың «Динамосының» қақпасына жауапсыз үш шайба соқты.
Биылғы маусымның сәтсіздігіне мамандар әртүрлі болжам жасап жатыр. Мәселен, бірі былтыр команданы өрге сүйреген бірқатар хоккейшінің командадан кеткені және олардың орнын басатын лайықты ойыншыларды алмағанның зардабын тартып жатыр дейді. Тіпті экс-бас бапкер Андрей Скабелканың да командадан кетуі «Барыстың» ойынына кері әсерін тигізгені де жанкүйерлер арасында айтылуда. Сондай-ақ кей мамандар пандемияға байланысты команданың дайындығы аз болғанын да алға тартып жатыр.
Маусым басталғалы бері «Барыс» Шығыс конференциясында бүгінге дейін 18 кездесу өткізіп үлгерді. Қазіргі кезде 20 ұпаймен 10-орында келе жатыр. Юрий Михайлис шәкірттері оның ішінде 9 матчты өз айдынында өткізген, 9 ойында қонаққа барған. Қазақстан командасы осы аралықта қарсылас қақпасына 41 шайба соғып, өз қақпасына 46 шайба өткізіп алған. Әрине, салыстырмалы түрде алып қарайтын болсақ, бұл жақсы нәтиже емес. Шайба соғу көрсеткіші бойынша орташа есеппен әр ойынға 2 шайбадан келеді. Елордадағы 9 ойында қарсыластар қақпасын 22 рет нысанаға алса ( бір ойында – 2,44), өздері 23 гол (2,55) жіберген. Сырттағы матчтарында шабуылшылардың да, қорғаушылардың да нәтижелері көңіл көншітпейді. 9 ойында 19 шайба соғып (1,1), өздері 23 шайба (2,55) өткізіп алған.
27 жастағы қорғаушы Даррен Диц – «Барыстың» көрінбейтін көшбасшысы. Қазақстан азаматтығын алған канадалық хоккейші өзінің шебіндегі ойыншылардан нәтижелігімен алда тұр. Тіпті көптеген шабуылшы Диц секілді көрсеткішімен мақтана алмайды. Ол 17 ойында қарсыластар қақпасына 8 шайба соғып, 2 рет әріптестерінің көзге түсуіне жағдай жасаған. Пайдалылық коэфициенті жағынан Диц тек «Барыстағы» ғана емес, лигадағы үздіктердің бірі.
Даррен қорғаушы-бомбардирлер арасында 10 ұпаймен екінші орында келеді. Үздіктер көшін 16 (8-8) ұпаймен Миккотек Лехтонен («Йокерит») бастап тұр. Сондай-ақ Диц – «Барыс» сапында айдында ең көп уақыт өткізетін хоккейші. Орташа есеппен бір матчта 24 минуттай айдында болады.
Командалық ойында шабуылшыларға қарағанда, қорғаушының гол соғатыны мақтанарлық нәтиже емес. Бірақ команданы алға сүйрейді деген шабуылшы легионерлер жарытпай жатқанда, қорғаушылардың шайба соғуы да заңдылық шығар. Мәселен, биыл ғана «Барыстың» жейдесін киген швециялық Якоб Лилья мұзайдынға 17 мәрте шығып, қарсыластар қақпасын небәрі 5 мәрте дәл көздеген. Сондай-ақ былтыр «Ак Барс» құрамында өнер көрсетіп, биыл «Барысқа» қайта оралған канадалық шабуылшы Мэтт Фрэттин 18 ойында екі шайба соққан. Ол екі голын да кейінгі екі ойында соққанын ескерсек, канадалықтың ойыны жүре бастаған сыңайлы. Қазіргі таңда командадағы шабуылшылардың арасында ең нәтижелі ойын көрсетіп келе жатқан – Никита Михайлис. 18 ойынның барлығында мұзайдынға шыққан жерлесіміз қарсылас командалардың қақпасын 7 мәрте дәл көздеген. Сонымен қатар екі рет әріптестеріне нәтижелі пас асырған. Кейінгі орындарда Роман Старченко мен Кертис Волк тұр. Екеуі де төрт шайба соққан.
Бас бапкер Юрий Михайлистің қорғаушыларға да, шабуылшыларға да көңілі толмайтыны анық. Сондықтан ол жаңа жылға дейін команда құрамының тамырына қан жүгірту үшін бір шабуылшы және бір қорғаушы алдыртты. «Барыс» клубының баспасөз қызметі 30 қазанда 29 жастағы канадалық шабуылшы Филип Вароне мен 2 қарашада 25 жастағы тағы бір канадалық қорғаушы Диллон Хетерингтонмен келісімшарт жасалғанын хабарлады. Қазірше екі ойыншы да пандемияға байланысты Қазақстанға келе алмай отыр.
«Барыс» командасы алдағы бес ойынның үшеуін сырт айдында, екеуін «Барыс Аренада» өткізеді. Қазақстанда өткен ойындарға қарағанда, «Барыс» үшін сырттағы ойын қиын болғалы тұр. Мәселен, жексенбі күні жерлестеріміз Батыс конференциясында төртінші орында тұрған Череповецкінің «Северсталімен» кездессе, екі күннен кейін үшінші орындағы Ярославльдің «Локомотив» клубымен бақ сынайды. Ал 12 қарашада Нижнекамскіде «Нефтехимиктің» қонағы болады. Егер осы үш ойынның екеуінде жеңіске жетіп, елорадада «Динамо» Минск пен Магнитогорскінің «Металлург» клубтарынан ұпай алатын болса, жерлестеріміз үздік сегіздіктің қатарына енетіні сөзсіз.
