Кеше «Нұр Отан» партиясы жанындағы Сыбайлас жемқорлыққа қарсы күрес жөніндегі республикалық қоғамдық кеңестің отырысы болып, онда партияның «Қазақстан-2050» Стратегиясын жүзеге асыруға бағытталған Доктринасындағы міндеттерге сәйкес аталған індетке қарсы кешенді шаралар белгілеу мәселелері талқыланды.
Кеше «Нұр Отан» партиясы жанындағы Сыбайлас жемқорлыққа қарсы күрес жөніндегі республикалық қоғамдық кеңестің отырысы болып, онда партияның «Қазақстан-2050» Стратегиясын жүзеге асыруға бағытталған Доктринасындағы міндеттерге сәйкес аталған індетке қарсы кешенді шаралар белгілеу мәселелері талқыланды.
Отырысты «Нұр Отан» партиясы Төрағасының бірінші орынбасары Бауыржан Байбек ашып, жүргізіп отырды. Ол өзінің сөзінде Елбасы Нұрсұлтан Назарбаевтың осы бағыттағы тапсырмаларын еске алып және партияның Доктринасында айтылған: «Сыбайлас жемқорлықпен күресу баршаның және әр адамның міндеті. Сыбайлас жемқорлық біздің мемлекеттілігіміз бен демократиямызды жегідей жеуде. Сондықтан біз сыбайлас жемқорлықтың жолын кесудің және қоғамда оның кез келген көрінісіне ымырасыздық ахуалын қалыптастырудың жүйелі жағдайын жасаймыз», деген сөздерін жиналғандарға айтып беріп, республикалық кеңес еліміздегі жемқорлыққа қарсы жұмыс жүргізетін базалық қоғамға айналып, осы істегі партияның тұтас қызметін үйлестіруі тиіс екендігін жеткізді. Мемлекет басшысы жемқор болғаны үшін лауазымына, атқарған қызметіне қарамастан, кез келген шенеуніктің жаза тартуы қажеттігін талап етіп отыр. Партия Доктринасында заң алдында барлық азаматтың тең екендігі атап көрсетілген. Конституция мен заңнамаларды бұлжытпай сақтау – әділетті қоғамның баршаға тең мүмкіндік жасауының негізі. Қоғамдық кеңестің басшылыққа алып жұмыс істейтіні осы бағдарлар, деді Б.Байбек.
Отырыста Сыбайлас жемқорлыққа қарсы күрес жөніндегі республикалық қоғамдық кеңестің құрылғанына бес жыл толғаны және осы жылдар аралығында оның төрағасы болып Оралбай Әбдікәрімовтің жемісті жұмыс атқарғаны аталып өтті. Партияның соңғы бюро отырысында партия Төрағасы да қоғамдық кеңестің жұмысына жоғары баға берді. Міне, осы табысқа жетуде Оралбай Әбдікәрімұлының жеке басының еңбегі зор. Сіздің тікелей басшылығыңызбен біздің партияның Парламенттегі фракциясы «Сыбайлас жемқорлыққа қарсы күрес туралы» заң жобасын әзірледі. Ал қоғамдық кеңестің өзі сыбайлас жемқорлыққа қарсы ымырасыз жұмыс жүргізгені үшін халықтың ризашылығына бөленді, деді Б.Байбек.
Одан әрі бюроның соңғы отырысында Оралбай Әбдікәрімұлы төрағалық міндетті басқа адамға жүктеу туралы өтініш жасағаны айтылды. Бұл өтініш қабылданып, партия Төрағасы Н.Назарбаев комиссия төрағасы қызметіне О.Әбдікәрімовтің ұсынысымен Мәжіліс депутаты Қайырбек Сүлейменовті бекітті, дей келіп, Б.Байбек: «Ал Оралбай Әбдікәрімовтің өзі кеңес төрағасының бірінші орынбасары болып қала беретінін жеткізді», деді. Сонымен бірге, Б.Байбек жемісті жұмыстары үшін партияның атынан О.Әбдікәрімовке өз ризашылығын айтып, Алғыс хат пен естелік кәдесый тапсырды. Өзі тарапынан О.Әбдікәрімов еңбегін бағалағаны үшін нұротандықтарға ризашылығын білдірді. Сонымен бірге, әріптестері арасынан А.Платонов, Қ.Айтаханов, А.Соловьева, О.Өксікбаев сөйлеп, О.Әбдікәрімовтің жұмысына жоғары баға берді.
Өзінің қорытынды сөзінде партия Төрағасының бірінші орынбасары «Кеңес жемқорлық мәселесімен күресудің жаңа жолдарын қарастыруы қажет. Жұмыс істеудің инновациялық үлгілерін кеңінен қолданып, негізгі күшті жемқорлықпен жүйелі күреске бағыттағаны жөн», деп атап көрсетті. Сонымен бірге, отырыста «Қазақстан-2050» Стратегиясында айтылған басымдықтарды ескере отырып, «Нұр Отан» партиясының сыбайлас жемқорлықпен күресудің ұзақ мерзімді жаңа стратегиясы мен бағдарламасын әзірлеу туралы шешім қабылданды.
Кеңес отырысына «Электрондық партия» жобасы аясында бейнеконференция арқылы барлық облыстардағы партия төрағаларының бірінші орынбасарлары және сыбайлас жемқорлыққа қарсы күрестің өңірлік кеңесінің мүшелері де қатысты.
Жақсыбай САМРАТ,
«Егемен Қазақстан».
