Өтпелі кезеңнің өкпек желіне қабырғасы қайысқан ауыл тұрғындары алғашқы кезде абдырап қалғаны да шындық. Нарықтық қатынастар беймәлім дүние болатын. Ойға алғаның түгел жүзеге аса бере ме? Алғашқы ұмтылыста жолы болмағандар кейін беті қайтып, дағдарып та қалды. Өйткені олар кәсіпкерліктің қыр-сырын біле бермейтін. Бүгінгі таңда ол олқылықтың орнын толтыруға қам жасалып жатыр. Бағдарламаға қатысушылар кәсіпкерлік дағдыларын жете меңгеріп, бизнес жобаларын дайындауға үйренуде. Осы арқылы өз істерінің алға басатындарына сенімді.
Биыл ауданда бағдарлама арқылы оқыған 54 адам несие алады деп жоспарланғанымен, тек 14-іне ғана 58 млн теңге көлемінде несие берілді. Бір айта кетерлігі, тәуекел етіп, несие алушылардың көпшілігі ата кәсіп – мал шаруашылығымен айналыспақшы. Шынында да, ғасырдан ғасырға жалғасып келе жатқан, атадан мирас болып қалған бұл шаруаның қатпарлы құпиясы да жоқ. Тек өз ісіңе барынша мұқият болсаң болғаны.
Ойға алған іс оңғарылып кетсе, өңірдегі азық-түлік бағасы да арзандауы әбден мүмкін. Оның үстіне мал басы өскен сайын біреулер жем-шөбін дайындап, енді біреулер дайын өнімді өткізіп, қаржы табарлық қарекет көбейеді. Аудандық жұмыспен қамту орталығының маманы Айжан Мұхамедиеваның айтуына қарағанда, биыл 31 грант бөлінген екен. Қазіргі күні бағдарламаға қатысуға сұраныс көбейе түскен. Бұл да – жағымды жайт. Өйткені ауыл тұрғындары адал еңбектің нәсібін көрмекші болып, ұмтылғаны дұрыс. Ынталанушылар бар болған соң бюджеттік өтінім де берілген.
Қазір ауданда өзгеге үлгі боларлық жаңа кәсіпкерлер легі қаулап өсіп келеді. Олардың ісі берекелі болған сайын, өзгелер де қатардан қалмайық деп қамдана түсуде. Кәсіпкерліктің дамуының арқасында сән салоны, техникалық қызмет көрсету стансасы ашылып, халыққа қызмет ете бастаған. Осындай талапты жанның бірі – аудан тұрғыны Елена Горбунова бағдарлама аясында шағын несиеге қол жеткізіпті. Алдымен кәсіби білігін шыңдайтын курс бітірген. Тиімділігін егжей-тегжейлі екшеген, бизнес жоспарын жасаған. Бұрын бірыңғай саудамен айналысқан адам үшін кәсіпкерлік таңсық дүние емес. Демеу боларлық 6 млн теңге несие қолына тиген соң азық-түлік сататын дүкен ашып алыпты. Қазір бұл дүкенде жергілікті шаруашылықтарда өндірілген көкөніс пен сүт өнімдері сатылады.
– Аудандағы бағаны байыптап қарап, тым өсірмеуге тырыстым. Сонда өнімім өтімді болады, халыққа да жақсы. Ал шаруашылық басшылары бейнетін белден кешіп жүріп өндірген өнімдерін тапсыратын жер іздемейді, – дейді ол.
Жұмысын дөңгелетіп отырған кәсіпкер алдағы уақытта тұшпара цехын ашып алмақшы. Егер бұл ойы жүзеге асса, бірнеше адамға жұмыс болмақ.
Ақмола облысы
Бұланды ауданы
