Жасыратыны жоқ, бұл матчта «Локомотивтің» бас бапкері Андрей Скабелка өзі екі жыл басқарған қазақстандық команданың осал тұсын таба білді. Нәтижесінде, Ярославль командасының ойыншылары өз айдынында өткен кездесуде «Барыс» қақпасына 7 шайба соқты. Бұл – елордалық клубтың осы маусымдағы ең ірі жеңілісі.
Кездесудің есебі небәрі 11-секундта-ақ ашылды. Өткен маусымда «Барысты» өрге сүйреп, бұл маусымда «Локомотивтің» намысын қорғап жүрген финляндиялық қорғаушы Атте Охтамаа кездейсоқ шайба соғып көзге түсті. Ал 2018/2019 жылы «Барыс» клубында ойнаған швециялық шабуылшы Андре Петерссон 18 және 31 минуттарда «Барыс» қапасын екі мәрте дәл көздеді. Сондай-ақ «Локомотив» құрамынан Егор Аверин (4-минут), Денис Алексеев (33-минут), Егор Коршков (34-минут) және Владимир Ткачёв (45-минут) өз есімдерін таблоға жаздыртты. Ал «Барыс» клубынан бұл ойында Виктор Сведберг (15-минут) пен командаға жуырда ғана қосылған канадалық қорғаушы Диллон Хетерингтон (53-минутта) көзге түсті.
Елорда командасы біріншіліктегі келесі кездесуін бүгін Нижнекамскінің «Нефтехимик» клубымен өткізеді. Бұдан кейінгі үш кездесуі Қазақстанда ойналады.
