Онлайн форматтағы республикалық шақырылымға еліміздің 17 өңірінен Жастар ісі жөніндегі комитет төрағалары, жастар және студенттік ұйымдардың көшбасшылары, жастармен жұмыс департаменттерінің директорлары, проректорлар жиналды. Сонымен қатар 300-ден астам белсенді жас жиында бас қосып, өзекті мәселелерді қозғады.
Республикалық слетті Ақпарат және қоғамдық даму министрлігі Жастар және отбасы саясаты комитетінің төрағасы Шахмардан Байманов ашты. Ол өз сөзінде студенттік қозғалыстың 15 жылдығымен құттықтап, студенттердің елдің дамуындағы маңызды рөлін атап өтіп, жастардың өзін өзі басқаруын дамыту, олардың бастамаларын қолдау және басқа да жүзеге асырылып жатқан шараларға тоқталып өтті.
Сонымен қатар Білім және ғылым министрі Асхат Аймағамбетов, Парламент Мәжілісінің депутаты Геннадий Шиповских, «Атамекен» ҰКП басқарма төрағасының орынбасары Олжас Ордабаев, Білім және ғылым министрлігі Жоғары және жоғары білімнен кейінгі департаменті директорының орынбасары Б.Нарбекова, М.Нәрікбаев атындағы Қазақ гуманитарлық заң университетінің провосты, Білім және ғылым министрлігіне қарасты ADAL BILIM жобалық офисінің әкімшісі Сергей Пен, «Астана» медицина университетінің ректоры Павалькис Дайнюс, Аккредиттеу және рейтингтің тәуелсіз агенттігінің (НААР/IAAR) бас директорының стратегиялық даму жөніндегі кеңесшісі Г.Искакова, Білім және ғылым министрлігіне қарасты «Қаржы орталығы» АҚ эксперті А.Құрмансейіт, Білім сапасын қамтамасыздандыру бойынша тәуелсіз агенттігінің (IQAA) Талдау және сапа бөлімінің басшысы Г.Рақымжанова қазақстандық білімді дамыту және заманауи сын-қатерлердің білім сапасына әсері, кадрлардың біліктілігін көтеру, жас мамандарды жұмыспен қамту мәселелері туралы ойымен бөлісіп, жастарға ақыл-кеңестерін айтты.
Сондай-ақ қатысушылар Қазақ гуманитарлық заң университетінің білім жүйесімен, студенттеріне арналған демалыс орындары және заманауи коворкинг орталықтарымен танысты. Кездесу барысында Университет төрағасы Талғат Нәрікбаев белсенді жастардың сұрақтарына жауап берді.
Шараның басты қонағы – Білім және ғылым министрі Асхат Аймағамбетов слетке қатысқан жастармен пікір алмасты. Министр қатысушыларға студенттік шағындағы естеліктерін айтып, алдағы жоспарларымен бөлісті.
«Университет, колледждердегі Жастар ісі жөніндегі комитеттердің әлеуетін көтеру жоспарда бар, сол жұмыстарды қолға алып жатырмыз. Әр университетте арнайы комитет болуы керек деп есептеймін. Ал студенттердің мүддесін қорғап, іс-шараларын өткізуге жауапты ұйым ретінде Студенттік парламент, Студенттік өзін өзі басқару ұйымдары құрылуы қажет», деді Асхат Аймағамбетов.
Жиын барысында министр еліміздің білім саласын дамыту, сапалы білім беру мен кадр даярлау, жоғары оқу орындарының лицензиясын қайтарып алу, диплом «басып шығаратын» университеттерді жабу, студенттерді жатақханамен қамтамасыз ету, жұмысқа тұру сынды бірнеше өзекті мәселені қозғап, көптің көкейінде жүрген сұрақтарға жауап берді.
Қазақстан студенттері альянсының жетекшісі Ілияс Түстікбаевтың айтуынша, құрылым 15 жыл ішінде еліміздегі ең үлкен жастар ұйымына айналған. «Ұйымымыз білім саласын дамытуға өз үлесін қосып келеді. Соңғы жылдары жастар саясатында да үлесіміз айқын. Бүгін 50-ге жуық жастар ұйымының басын біріктіріп үлкен шара өткізіп отырмыз. Бұл слет – жастар мәселелері қозғалатын алаң. Бұл жер өзгерістерге бастау болса, біз қуанамыз. Білім және ғылым министрлігі жанынан Студенттер мәселесі жөніндегі кеңестің құрылатыны келісілді. Ендігі кезекте университет пен колледж белсенділерін біріктірген кеңестің ел жастарына пайдасы мол болады деп сенеміз», дейді ұйым төрағасы.
Шараның қорытындысы ретінде жыл бойы жоғары нәтиже көрсеткен студенттер «Қазақстан алтын жастары», «Пікірсайыс турнирі», «Үздік ЖіЖК» және басқа да конкурс нәтижелері бойынша қаржылай және арнайы сыйлықтармен марапатталды. Аталған байқаулар «Жастардың өзін өзі басқару органдары жүйесін дамыту» жобасы аясында өткізілгенін атап өткен жөн.
