Кәсіпқой бокс • 13 Қараша, 2020

WBC International белбеуін иеленді

155 рет
көрсетілді
3 мин
оқу үшін

Қазақстандық кәсіпқой боксшы Тұрсынбай Құлахмет күні кеше Англияда өткен бокс кешінде өнер көрсетіп, небәрі екінші кездесуінде-ақ бірінші орта салмақтағы WBC International белбеуін иеленді.

WBC International белбеуін иеленді

Йоркшир қаласында ұйымдас­тырылған айқастың басты жекпе-жегінде рингке көтерілген отандасымыз ағыл­шындық өте тәжірибелі боксшы Маклей Макгоуэнмен күш сынасты. Кәсіпқой бокстағы тұсаукесер кездесуін 2014 жылы өткізген 25 жастағы былғары қол­ғап шебері бүгінге дейін шаршы алаңға 15 мәрте шығып, оның бірде-біреуінде қарсыласына есе жібермеген. Тек бір кездесуінде ғана тең түскен.

Өзінің екінші кездесуінде осындай қарымды боксшыға тап болған Тұр­сынбай Құлахмет қарсыласынан еш қаймыққан жоқ. Салмақ өлшеу сәтінде британиялық боксшы өздеріне тән әдет­пен жерлесімізді сөзбен түйреп алса да, Тұрсынбай қазақы байсалдылықпен оның айтқандарына миығынан бір күліп, «әуселеңді рингте көрерміз» деген ишара білдірді.

Жекпе-жек бастала сала аңдысып отырудың қажеті жоқ деп санаған қандасымыз бірден рингтің ортасын иеленіп, қарсыласын соққының астына ала бастады. Раунд сайын жыл­дамдығын арттырған жерлесіміз жетін­ші раундтың соңғы секундтарында оң қолымен қарсыласының құлақ шеке­сінен ұрып, Макгоуэнді есеңгіретіп тас­тады. Нокдаун! Төреші тез арада есеп ашып, британиялықтың өзіне келуі үшін санай бастады. Реферидің санағы бітемін дегенше, раундтың аяқталғанын білдіретін гонг үні естілді. Сөйтіп Маклейге ес жинап алу үшін тағы бір минут уақыт берілді.

Сегізінші раундта жекпе-жекті мер­зімінен бұрын аяқтауға ұмтылған Құлахмет кезекті үш минуттың ортасында қарсыласын итеріп жібергені үшін төреші жерлесімізге ескерту жасап, үш ұпайын алып қойды. Қалған екі раундта да бір деммен жұдырықтасып шыққан қазақстандық боксшы жекпе-жек қорытындысы бойынша төрешілердің бірауыз шешімімен жеңіске жетті. Үш төреші де 99-89, 99-89, 99-89 есебін тіркеді.

Осылайша жерлесіміз өзінің екінші айқасында жеңіске жетіп қана қой­май, WBC International белбеуін иеленді. Сөйтіп ол қазақстандық кәсіпқой бокс­шылардың арасында белдікке ең жылдам қол жеткізген бірінші боксшы атанды. Тіпті Геннадий Головкиннің өзі кәсіби шаршы алаңдағы алғашқы белдігін 2009 жылы 17-ші кездесуінде беліне таққан болатын.

Кешегі жеңісінен кейін отандасымыз өз салмағында 2025 боксшының арасында әлемдік рейтингте 102-орынға көтерілді. Айта кетейік, әуесқой бокста Азия чемпионы және әлем біріншілігінің қола жүлдегері атанған Тұрсынбай Құлахмет кәсіпқой бокстағы алғашқы жекпе-жегін осы жылдың 23 тамызында Сағадат Рахманқұлмен өткізіп, техникалық нокаутпен жеңіске жеткен еді.