«Бүгінде туристер арасында Rixos Water world қонақүйі бағытынан бөлек Бозжыра шатқалы да танымал. Біздің статистикамыз бойынша қазір бұл жерге келушілер саны өткен жылмен салыстырғанда 10 есе артқан. Жобамен биыл 2 мыңнан астам адам келген. Ал келесі жылы бұл көрсеткіш артып, кемі 10 мыңнан аса турист келеді деген болжам бар», деді вице-министр.
Жуырда әлеуметтік желілерде əкімдік шатқалда «Бозжыра сафари отель» қонақүй кешені жобасын жүзеге асырады деген хабар тараған еді. Бұл жайтқа қатысты экологтер аталған жерге құрылыс салу зиян екенін айтып, қарсы болған. Өркен Бисақаев осы жайтқа қатысты түсініктеме беріп, алдымен экономика тұрғысынан қажеттілік пен экология арасындағы теңдікті сақтау маңызды екенін жеткізді.
«Шатқалды қарап шыққан мамандар бұл жерге адамдар мен көліктер еркін, еш қиындықсыз келіп-кете алатынын айтып отыр. Яғни жер рельефі ешқандай арнайы дайындықты керек етпейді. Біздің ойымызша, аталған жоба көп турист келетін ерекше табиғи орын үшін үлкен қауіп төндіреді. Бұл жерде зиян тауға емес, жазыққа тиеді. Неге десеңіз, жазықтағы топырақ көп көліктің бейберекет қозғалысынан бүлініп, шаңға айналады. Туристер қозғалысын реттеп, туристер қабылдау үшін Бозжыра тауына жақын жерде туристік нысандар мен ұйымдастырылған қозғалыс үшін кіреберіс жол қажет», деп түсіндірді Өркен Бисақаев қоғам өкілдеріне.
Сонымен қатар вице-министр шатқал аумағында инфрақұрылымды ретке келтіріп, туристер қауіпсіздігі мен қолайлығы үшін бірқатар шараны іске асыру керегін атап өтті.
«Бозжыра шатқалы маңындағы нысан құрылысы қоғам назарына ұсынылып, экология тұрғысынан сараптамадан өтіп, қоршаған ортаға əсері қандай болатынын анықтау керек. Дəл қазір қонақүй құрылысы жоспарда жоқ. Сонымен қоса ешқандай жоба мақұлданып, бекітілген жоқ», деді ол.
Бозжыра шатқалы Маңғыстау облысында жергілікті маңызы бар «Жабай Үшқан» қорығының аумағында орналасқан. «Жабай Үшқан» киелі орны Маңғыстау облысы әкімінің қаулысымен 2012 жылы құрылған. Қазір облыстағы «Қызылсай» мемлекеттік аймақтық табиғи паркінің құрамында. Қорық төлқұжатына сәйкес аумаққа туристердің кіруіне, туристерді қабылдайтын нысандар жұмысына рұқсат берілген.
