Бұған дейінгі ойында «Локомотивтен» ірі есеппен жеңілген соң, «Барыс» хоккейшілеріне психологиялық тұрғыдан бұл кездесу қиынға соқты. Дегенмен жерлестеріміз жеңіс үшін барын салды. Матч бастала сала жылдам шабуыл ұйымдастырып, кездесудің 3-минутында есеп ашты. Гол авторы – Линус Виделль. Бұл – швециялық шабуылшының кейінгі төрт ойындағы үшінші голы. Арада 5 минут өткенде «Нефтехимик» хоккейшісі Марат Хайруллин ойындағы есепті теңестіріп кетті. Бірінші кезең 1:1 есебімен аяқталды.
Екінші 20 минут қонақтар үшін сәтті басталды. Елордалық клуб хоккейшілерінің жылдам шабуылы Якоб Лилияның голымен аяқталып, есеп 2:1-ге жетті. «Барыс» ойыншылары есептегі үстемдікті матч соңына дейін сақтап, маңызды жеңіске қол жеткізді. Осылайша, сырт айдындағы үш ойынды жеңіспен бастап, жеңіспен түйіндеді. Алғаш «Северстальды» 3:1 есебімен жеңсе, екінші кездесуде «Локомотивтен» 7:2 есебімен оңбай жеңілген-ді.
