Консорциумның құрамына қазақстандық үш компания кіреді. Олар – «Темір Зат» ЖШС, «BauProjekt» ЖШС және «MCI Group» ЖШС. Олар жобалық-сметалық құжаттаманы әзірлеп, кен байыту комбинатына арналған жабдықты салуды және жеткізуді жүзеге асыратын болады.
– Ашық тендер қорытындысы бойынша конкурстық комиссия консорциумды жеңімпаз деп тапты. Барлық корпоративтік іс-шара аяқталған соң EPC келісімшартына, яғни жобалау, сатып алу және құрылыс аудандарын жүзеге асыру келісімшартына қол қойылды. Мердігерлер мұндай нысандарда жұмыс істеген. Жұмыс тәжірибелері жеткілікті, – деді «Алайғыр» бірлескен кәсіпорны» ЖШС бас директоры Данель Сқақов.
Кен байыту комбинатының құрылысы кезінде 253 адам жұмыспен қамтылады. Ал пайдалануға берілгеннен кейін нысанда 400-ден астам жұмыс орны құрылады. «Алайғыр» кен байыту комбинатының құрылысына салынған инвестиция көлемі 128,5 млн АҚШ долларына тең.
Қазіргі уақытта 143 шақырымдық 110 кВ жоғары вольтты желі және 21 шақырымдық технологиялық магистраль пайдалануға берілді. Кен байыту жұмыстарына дайындық іс жүзінде аяқталды. Инфрақұрылым нысандарының құрылысы жалғасуда. 2022 жылдың соңына дейін кен байыту комбинаты жобалық қуатына жетуге тиіс. Яғни 900 мың тонна кен өндіруі керек.
Еске сала кетейік, «Алайғыр» кен орны Қарқаралы мен Шет аудандарының шекарасында, Қарағанды қаласынан оңтүстік-шығысқа қарай 130 шақырым жерде орналасқан. Мұнда полиметалл кен орнын игерумен айналысады. Кен орнының расталған қоры шамамен 1 млн тонна қорғасынға тең.
