Түркістан облысында "Еңбек" бағдарламасы аясында 67 мың адам қолдау алды

Аймақтар • 25 Қараша, 2020

Түркістан облысында "Еңбек" бағдарламасы аясында 67 мың адам қолдау алды

16 рет көрсетілді

1 қарашадағы жағдай бойынша Нәтижелі жұмыспен қамтуды және жаппай кәсіпкерлікті дамытудың 2017 – 2021 жылдарға арналған «Еңбек» мемлекеттік бағдарламасы шеңберінде Түркістан облысында 67 мың азаматқа қолдау көрсетілді, оның 48 мыңнан астамы тұрақты немесе субсидияланатын жұмыс орындарына жұмысқа орналастырылды.

Ақмарал АҒЗАМҚЫЗЫ

Арыс қаласының тұрғыны, 24 жастағы Айдос Досымжан ұзақ уақыт бойы өзіне лайықты жұмыс таба алмай жүрген. Жұмыспен қамту орталығында оған таңдау үшін бірнеше бос жұмыс орны ұсынылды және ол өз қаласының жұмыспен қамту және әлеуметтік бағдарламалар бөлімінің жанындағы «Үйде әлеуметтік қызмет көрсету» коммуналдық мемлекеттік мекемесіне әлеуметтік қызметкер болып жұмысқа орналасуға шешім қабылдады.

«Жұмыспен қамту орталығына хабарласуға бағдарлама бойынша жұмыс тапқан досым кеңес берді. Мен бес ай бойы әлеуметтік қызметкер болып жұмыс істеймін. Оның үш айында – ұйымның штатында тұрақты қызметкер ретінде қызмет етудемін. Өзіме ұнайды, перспектива бар», – деді жас жігіт.

«Еңбек» мемлекеттік бағдарламасының тағы бір қатысушысы Әлімжан Хасан Жетісай қаласының Жастар ресурстық орталығында тұрақты жұмысқа орналасты. Осы өңірде, бірақ №1 балалар-жасөспірімдер спорт мектебіне Эламан Тұрдымұратов орналасты.

Сонымен қатар, Түркістан облысында кәсіпкерлік бастаманы дамытуға ерекше көңіл бөлінеді. Мәселен, «Еңбек» мемлекеттік бағдарламасы аясында Сарыағаш ауданының тұрғыны Фатима Рузиева жеңілдетілген шарттармен микрокредит алып, 15 тігін машинасын сатып алып, камуфляж киімін тігетін цех ашып, қосымша 6 адамды жұмыспен қамтып отыр.

«Әрбір жүгінген адамға өзіне жақын сала бойынша барынша кең таңдау беруге тырысамыз. Жастар мен көпбалалы аналарға басымдық беріледі. Балаларды тәрбиелеуден қол үзбей, мемлекеттік грант қаражаты есебінен жеке ісін ашып, үйде жұмыс істеуге мүмкіндігі бар», – деп атап өтті Түркістан облысының жұмыспен қамтуды үйлестіру және әлеуметтік бағдарламалар басқармасының басшысы Әсия Темірбаева.

Өңірдің жұмыспен қамтуды үйлестіру және әлеуметтік бағдарламалар басқармасының мәліметінше, ағымдағы жылғы 1 қарашадағы жағдай бойынша мемлекеттік бағдарлама шеңберінде жұмыспен қамтуға жәрдемдесу бойынша шараларды 67 мыңнан астам адам алды. Осылайша, 2 мыңға жуық адам кәсіптік оқытудан өтті, кәсіпкерлік қызметті дамытуға гранттар мен жеңілдікті кредиттер 10,5 мың адамға берілді, тұрақты жұмыс орындарына 23,7 мың азамат, ал жастар практикасы бойынша 6 мың адам жұмысқа орналастырылды. Өңірдің 4 277 тұрғынына әлеуметтік жұмыс орындары ұсынылды, 20,4 мың адам қоғамдық жұмыстарға тартылды.

Естеріңізге сала кетейік, биыл Қазақстан бойынша «Еңбек» бағдарламасына 580,9 мыңнан астам адам қатысып, түрлі қолдау түрлерін алды. 379,5 мың адам жұмысқа, оның ішінде 231,5 мың адам тұрақты жұмысқа орналастырылды, мемлекет субсидиялайтын жұмыс орындарына 198 мың адам жұмысқа тұрды, 12 мың жеңілдікті кредит және 34 мың қайтарымсыз грант берілді, «Бастау Бизнес» жобасы бойынша кәсіпкерлік негіздеріне қысқа мерзімді оқытудан 33,2 мың адам өтті.

Күннің маңызды және өзекті жаңалықтарын «Егемен Қазақстан» телеграм каналынан оқыңыз