Аймақтар • 26 Қараша, 2020

Көрмедегі көркем кітаптар

37 рет көрсетілді

Биыл даңқты батыр, қаламгер Бауыржан Момышұлының туғанына 110 жыл толып отыр. Ұлы Отан соғысында өшпес ерлік көрсеткен көрнекті тұлғаның есімі әрдайым ел есінде.

Жазушының өзі «Ұшқан ұя» атты өмірбаяндық кіта­бында Жуалы ауданын­дағы Көлбастау ауылында дүниеге келгенін, әкесі Момыштың ел арасында ағаш ұстасы және етікші, зергерлігімен танымал болғанын, анасы Рәзияның ерте дүниеден өткенін, сол кезден бастап әжесі Қызтумастың қолында өскенін жазады.

Батырдың өнегелі өмір жолын бүгінгі ұрпаққа кеңінен насихаттау мақсатында Шу ауданы Жаңажол ауылындағы Б.Момышұлы атындағы орта мектептің кітапханасында қа­лам­гердің елуге жуық әде­би кітаптары қойылды. Ар­найы ұйымдастырылған көр­меге келушілер жазушының «Ұш­қан ұя», «Музей апа», «Арпа­лыс», «Генерал Панфилов», «Айтылмаған ақиқат» және «Алыстан сәлем жолдаймын» атты кітаптарымен танысты. Әр жылдары жазылған бұл шығармаларда сол кезеңнің түрлі суреттері жазушы кө­зімен берілген. Сондай-ақ ке­лушілерге Бауыржан Мо­мышұлының өмірінен мәлі­меттер беріліп, әсіресе 1924 жы­лы Шымкент қаласындағы жетіжылдық мектепті бітірген соң мұғалім болып жұмыс істегені де айтылды. «Әрине Бауыржан Момышұлы атамыз туралы айтылғанда әрбір қазақ соғыс жылдары қан майданда қол бастаған батырдың тұлғасын елестетеді. Еліміз батыр перзентінің есімін әрқашан есінен шығармайды. Атамыздың «Отан үшін отқа түс, күймейсің», «Өз ұлтын сыйламау, оны мақтаныш етпеу – сатқындықтың бел­гісі» деген нақыл сөздері әрдайым ұрпаққа ұран болып келеді. Соғыста болған әр­бір ата-бабамызды қа­шанда жүрегімізде, ойымыз­да, санамызда сақтап, қадірлей білуіміз қажет», дей­ді Жа­ңа­жол ауылындағы Б.Мо­мыш­ұлы атындағы орта мек­­теп­тің кітапхана меңге­рушісі Нұрсұлу Секеева.

Көрмеге келушілер қа­ламгердің бай мұрасын тамашалап, өмірі мен қызмет жолындағы тың деректерге де қанықты. Жалпы, Б.Мо­мышұлы атындағы мек­тептің кітапханасы алдағы уа­қытта да батыр есімін ұлық­тауды жалғастыра бере­тін болады.

 

Жамбыл облысы

 

Соңғы жаңалықтар

Әлем кубогы өтеді

Спорт • Бүгін, 20:28

Ұқсас жаңалықтар