Топтық кезеңнің аяқталуына әлі екі тур қалған болса да, Е және G тобында алғашқы екі орынды иеленіп, турнирдің келесі кезеңіне жолдама алған командалар анықталды. Е тобында «Челси» мен «Севилья», G тобында «Барселона» мен «Ювентус» плей-офф мәселесін ерте шешіп қойды. Бұл турда «Челси» сырт алаңда «Ренн» клубынан 2:1 есебімен басым түссе, «Севилья» да дәл осындай есеппен «Краснодарды» жеңді.
G тобында «Барселона» Киевте «Динамоны» 4:0 есебімен тас-талқанын шығарса, «Ювентус» өз алаңында «Ференцварошты» 2:1 есебімен жеңіп, қажетті үш ұпайына қол жеткізді. Сонымен қатар F тобында «Лацио» мен «Боруссия Д» кезекті үш ұпайын иеленіп, кейінгі кезеңге бір табан жақындай түсті. Н тобында ПСЖ өз алаңында Неймардың пенальтиден соққан жалғыз голының арқасында жеңіске жетсе, «Манчестер Юнайтед» сырт алаңда Түркия чемпионын ірі есеппен (4:1) тізе бүктірді.
