Іс-шараға ҚР Тұңғыш Президенті Қоры жанындағы Әлемдік экономика және саясат институтының басшылығы, дипломатиялық корпус пен академиялық топтардың, мемлекеттік органдардың өкілдері, бірқатар жоғары оқу орындарының студенттері және басқалар қатысты.
Іс-шараны ашқан Е. Ашықбаев талқыланатын мәселе Корей түбегіндегі бейбітшілік пен тұрақтылықты қамтамасыз ету ісінде ғана емес, сондай-ақ бүкіл өңірде және әлемде ұзақ мерзімді қауіпсіздікті нығайту ісінде де өте өзекті және маңызды екеніне назар аударды. Осы тұрғыда ол Тұңғыш Президент – Елбасы Нұрсұлтан Назарбаевтың келесі жылы 30 жылдығын атап өтетін Семей ядролық полигонын жабу туралы шешімі жаһандық деңгейде бейбітшілік пен қауіпсіздікті қамтамасыз етуге үлкен үлес қосқанын атап өтті.
Отандық дипломат еліміздің қарусыздану саласындағы тәжірибесі Корея Халық Демократиялық Республикасы үшін ең үздік тәжірибе мен үлгі бола алатынын атап өтті. Қазақстан 2017-2018 жылдары БҰҰ Қауіпсіздік Кеңесіне тұрақты емес мүшелігінің екі жылы ішінде Пхеньянның ядролық бағдарламасы төңірегіндегі дағдарысты бейбіт, саяси-дипломатиялық реттеуін нық және дәйекті түрде қолдады.
Іс-шараның негізгі баяндамашылары ретінде Оңтүстік Кореяның белгілі сарапшылары шақырылды, олар Қазақстанның ядролық қарусыздану саласындағы тәжірибесін мысалға келтіріп, Сеулдің Корей түбегін денуклеаризациялау саласындағы саясаты туралы, сондай-ақ Корея Республикасы мен Корея Халық Демократиялық Республикасы арасындағы қарым-қатынастардың қазіргі ахуалы туралы хабардар етті.
