Айта кету керек, Ағабек Чикинаев бұған дейін Литва, Польша, АҚШ, Германия, Ресей, Франция, Англия және басқа елдерде тағылымдамадан өткен. Ол «Балалардағы кеуде деформациясын емдеу» тақырыбында кандидаттық қорғаған. Балалардағы кеуде қуысының, жамбас буынының және аяқтың даму ақауларын емдейтін білікті маман. Туа біткен және жүре пайда болған ортопедиялық патологиясы бар бірнеше балаға күрделі ота жасаған.
Дәрігердің Ақтау шаһарына келуі Маңғыстау облыстық көпбейінді балалар ауруханасының директоры Аманбек Жұмыровтың Нұр-Сұлтан қаласындағы N2 көпбейінді ауруханасы басшылығымен жүргізілген сәтті келіссөздің арқасында мүмкін болды.
-Бұл менің Ақтау қаласына бірінші рет келуім. Үш күн ішінде балалар ауруханасының мамандарымен өз тәжірибеммен бөлістім. Аяқ, қол, церебралды сал ауруы сияқты патологиясы бар балалар көп екендігін жасырмауымыз керек. Бүгінгі күні ең ауыр формасы бар аурулар көп кездеседі. Жалпы кез-келген аурудың алдын-алу маңызды. Ол үшін дәрігерге уақытында хабарласқан жөн. Ауруханаға келетін болсақ қажетті жабдықтар да, білікті мамандар да бар екен. Жалпы біз аймақтарға жиі баруға тырысамыз, өйткені кішкентай науқастарға хирургиялық отаны тегін жасау мүмкіндігі туады. Біз өз тәжірибемізбен бөлісуге әрдайым дайынбыз, деді ол.
Ағабек Чикинаевтың айтуынша, Нұр-Сұлтанда жылына Маңғыстау өңірінен ота жасатуға баратын балалар шамамен 17% құрайды. Әсіресе Ақтау қаласынан, Бейнеу және Маңғыстау ауданыан көп. Бұдан былай ең күрделі оталарды облыстық балалар ауруханасының базасында жасауға болады және елордаға барудың қажеті жоқ.
Орындалған 17 отадан басқа 40 баланың ата-аналары ақысыз кеңес алды. Келесі жылы Ағабек Чикинаев Маңғыстау облыстық ауруханасында осындай тағы 2 шеберлік сабағын өткізуді жоспарлап отыр.
Айта кету керек, елордалық дәрігердің Ақтауға жасаған сапары "Exxon Mobil" компаниясының қаржылай қолдауының нәтижесінде мүмкін болды. Аталмыш мекеме бірнеше жылдан бері балалар ауруханасына жан-жақты қолдау көрсетіп келеді.
Маңғыстау облысы
