Кәсіпқой бокс • 30 Қараша, 2020

Сол қолдың соққысы сан соқтырды

1213 рет көрсетілді

Өткен сенбінің таңы қазақстандық спорт жанкүйерлері үшін қуанышты жаңалықпен басталды. Кәсіпқой бокс шаршы алаңында өнер көрсетіп жүрген әйгілі отандасымыз Данияр Елеусінов АҚШ төрінде өзінің кезекті жекпе-жегін өткізіп, екі тұжырым бойынша әлемнің экс-чемпионы намибиялық Джулиус Индонгодан басым түсті. Данияр азулы қарсыласын жай жеңіп қана қоймай, екі раундта екі рет есеңгіретіп, техникалық нокаутпен тізе бүктірді.

Бұл екі боксшының жекпе-жегі әу баста осы жылдың нау­рыз-сәуір айларының бірінде өтуі тиіс болған. Алайда әлем жұр­тына қауіп төндірген коронавирус пандемиясының салдарынан айқас бірнеше рет кейінге шегеріле берді. Десе де уәде етсе орындамай қоймайтын промоутер Эдди Хирн Даниярға бәрібір осы бокс кешін ұйымдастырып, жігіттік сертінен айнымады. Ал Елеусінов өз кезегінде қазақ­стандық жанкүйерлердің де, өзіне сенім артқан промоутер­дің де сенім үдесінен шыға білді.

Намибияның Виндхук қа­ла­сында дүниеге келген 37 жас­тағы Джулиус Индонго кәсіпқой бокста 2009 жылдан бе­рі бақ сынап келеді. Ең алғаш жеңіл салмақта өнер көрсеткен ол ірі жекпе-жегін жартылай орта салмақта өткізді. Кәсіби шаршы алаңдағы 20 жекпе-жегін өз отанында өткізген ол тек 2016 жылдан бастап ше­телде жұдырықтаса бастады. Сол жылы шаршы алаңда бір­де-бір рет жеңілмеген ре­сей­лік боксшы Эдуард Троя­новскимен кездесіп, IBF және IBO тұжырымдары бойынша әлем чемпионы деген атақ­тарға қол жеткізді. Сөйтіп кәсіп­қой бокс әлемінде сенсация жа­са­ды. Араға бір жыл салып Индонго WBA белдігінің иегері британиялық танымал бокс­шы Рики Бёрнсті де жеңіп, жар­тылай орта салмақтағы үш бірдей белдіктің иесі атанды. Бұл оның отанынан тысқары елде өткізген небәрі екінші жек­пе-жегі еді. Екі жылдың ішінде әлемнің бокс жұлдызына айналған ол мұнымен тоқтап қалғысы келмей, 2017 жылдың тамыз айында әлемнің абсолют­ті чемпионы атану үшін амери­калық әйгілі боксшы Теренс Кроу­фордты жекпе-жекке ша­­­­қырды. Өзіне тым сенімді бол­ған намибиялық боксшы үшінші раундта Кроуфордтың соққысына тап болып, оңбай жеңілді. Осылайша Индонго бір сәтте белдігінен де, абыройы­нан да айырылып қалды. Ал 2018 жылдың наурызында тағы бір америкалық боксшы Реджис Прогрейспен WBC белдігіне таласып, бұл жолы да техникалық нокаутпен жеңіліп тынды.

Жыл басында Данияр Елеу­сінов кәсіпқой бокста көргені мен түйгені мол боксшымен жұдырықтасады дегенді есті­генде «қалай болар екен?» дегендер аз болған жоқ. Өйткені отандасымыздың бұған дейінгі бок­сы біздің де, жанкүйерлердің де көңілінен аса шыға қойған жоқ еді. Бокс мамандары да Даниярға мықтылармен шығу үшін әлі де аралық жекпе-жек өткізу керек деген пікірлерін айтқан болатын. «Аттың сы­ры иесіне мәлім» дегендей, Да­нияр­дың дәл қазіргі бабы бізге қарағанда жанында жүрген жат­тықтырушысы әрі әкесі Марат Елеусіновке ғана мәлім ғой. Баласын бұл жекпе-жекке дайын деп есептеген әке бұл кез­­десудің өтуіне қарсы болма­ған.

Даниярдың жекпе-жегін көр­генде оның жұдырықтасу мәнері аздап өзгергеніне куә болдық. Бұрынғыдай қолын тө­мен түсіріп жүру деген атымен жоқ. Үнемі екі қолын жоғары кө­теріп, бетін соққыдан қорғап жүр­ді. Сондай-ақ ол әдетте артқа шегіне жүріп, екінші нөмірмен жұ­дырықтасатын. Ал бұл жолы тек алға ұмтылып, рингтің қо­жайыны екенін қарсыласына ұқ­тырғандай болды. Бірінші раундтың орта тұсында сол қо­лы­ның соққысымен қарсыла­сын нокдаунға жіберді. Екін­ші раундта да дәл осы жағ­дай қайталанды. Үш минут­тың алғашқы бір минуты тү­ге­сіл­генде Елеусіновтің сол қолымен жұмсаған екі соққы­сы қарсыласына дәл тиіп, на­ми­бия­лық боксшы тағы да есін жоғалтып алды. Төреші есеп ашып, санағын аяқтаған соң Индонгоның әлсірегенін көріп, жек­пе-жекті мерзімінен бұрын тоқ­тат­ты.

Осылайша жерлесіміз карье­расындағы ең алғашқы маңызды кездесуін сенімді жеңіспен аяқ­тап, орта салмақтағы IBF Intercontinental белбеуін беліне тақ­ты. Сондай-ақ ол барша жұрт­­қа рейтингте жоғары орында тұрған кез келген боксшымен жұды­рықтасуға қауқары бар екенін дәлелдеді. Ал Джулиус Индонго кәсіпқой бокстағы үшін­ші жеңілісінің кермек дәмін татты.

Соңғы жаңалықтар

26 қаңтардағы валюта бағамы

Қаржы • Бүгін, 12:46

Кобидің қазасы

Спорт • Бүгін, 10:47

Ұқсас жаңалықтар