Еуропа Одағы мен «Шығыс әріптестігі» саммиті аяқталды. Оның қорытындысы бойынша, Украина Еуропа Одағымен қауымдастық құру жөнінде келісімге қол қоймады. Бұл туралы Rg.ru хабарлады.
Баспасөз конференциясында еуропалық кеңестің төрағасы Херман Ван Ромпей, еурокомиссия басшысы Жозе Мануэль Боррозу мен Литва президенті Далия Грибаусукайте саммитті қорытындылады.
«Бірінші кезекте, қонақжайлығы мен саммитті сәтті өткізуге тырысқаны үшін Далия Грибаусукайтеге алғыс білдіргім келеді. Саммитке Еуропа Одағы өкілдері мен «Шығыс әріптестігі» мүшелерінің белсенді қатысқанын да атап өткен жөн, – деді Херман Ван Ромпей. – Еуропа Одағы – қарқынды жоба. Бұл бос сөздер емес. Еуропа Одағы жақын саяси байланыстарға сенеді. Бұның дәлелі ретінде одақтың Әзірбайжанмен визалық тәртіпті жеңілдету және Украинамен ортақ әуе кеңістігін құру жөніндегі келісімдерге қол қойғанын, сондай-ақ Молдавия және Грузиямен қауымдастық құру жөнінде келісімдер дайындағанын айта кетуге болады».
Еуропалық кеңестің төрағасы 2015 жылы өтетін «Шығыс әріптестігі» саммитінің мақсаты демократияны нығайтып, түрлі деңгейде ынтымақтастық жүргізу болатынын мәлімдеді.
«Өкінішке орай, Украина мен Армения қол жеткізілген келісімдер қатарына кірмеді, – деді Херман Ван Ромпей. – Алайда, біздің ұсынысымыз сол қалпында қалады. Батылдық танытып, шешім қабылдайтын кез келді».
Айдар Өрісбаев.
Дереккөз: Rg.ru
