Нұр-Сұлтандағы бәсекеде Юрий Михайлис шәкірттері бес ойынға созылған сәтсіздік сериясына нүкте қойып, өздері де, жанкүйерлері де тағатсыздана күткен алғашқы жеңісіне қол жеткізді. Бірінші кезеңнің 13-минутында «Барыс» сапынан Кертис Волк есепті ашып, командасын алға шығарды. Екінші кезеңді жоғары көңіл күйде бастаған жерлестеріміз ойын тізгінін қолдарына алып, 37-минутта есепті еселей түсті. Бұл жолы Якоб Лилия жанкүйерлердің қошеметіне бөленді.
Үшінші кезеңде есеп айырмасын қысқартуға барын салған мәскеулік команда кезеңнің аяқталуына санаулы уақыт қалғанда дегендеріне жетті. 55-минутта Йори Лехтерядан пас алған Сергей Широков «Барыс» қақпашысы Хенрик Карлссонды қапы қалдырды. Қалған бес минутта командалар бір-бірінің қақпасына гол соға алмады. Нәтижесінде елорда командасы 2:1 есебімен жеңіске жетті.
Тұрақты біріншіліктің турнир кестесінде «Барыс» 27 ойыннан кейін 27 ұпаймен 9-орында келеді. Жерлестеріміз келесі кездесуін бүгін Сочидің «Сочи» командасымен өткізеді.
