Ақтау қаласының оңтүстігінде 100 шақырым қашықтықта орналасқан Құрық порты – еліміздің экономикалық әлеуетіне серпін қосатын нысан. Порттың құрылысы 2015 жылдың сәуір айында басталып, оның алғашқы іске қосу кешен аймағы – темір жол паромды терминалы – 2016 жылдың 6 желтоқсанында пайдалануға берілді.
Маңғыстау жеріне жаңа паром желісі бойынша қадам басқан «Композитор Рахманинов» – RO-RO типтес аталған кемеде әртүрлі құрал-жабдықтармен алты Еуро жүк көлігі келді. Олардың біреуінде киви жемісі бар.
– Ең бастысы, паром арқылы көкөністер мен жеміс-жидектер тиелген жүк көліктеріндегі тауарларды төгіп-шашпай, яғни басқа көлікке ауыстырып жүктемей тұтынушыға жеткізуге мүмкіндік бар. «Құрық-Амирабад/Энзели» паромды желісі ирандық және қазақстандық кәсіпкерлер үшін де қызықты болатынына сенімдімін, дейді Құрық портының маркетинг және логистика бойынша атқарушы директоры Әлібек Өтегенов.
Құрық автомобильді инфрақұрылымы порт арқылы транзит және экспорттық-импорттық бағыттардағы өтуші жүктерді қабылдау мен жылдам қызмет көрсетуге толығымен дайын.
2020 жылдың 10 айында Құрық порты арқылы өтетін жүктерді тиеу 1,352 млн тоннаны құрады. Көрсеткіш өткен жылмен салыстырғанда 290 мың тоннаға немесе 21%-ға жоғары. Экспортқа мұнай, астық және халықтық қолданыстағы тауарлар жіберілсе, заттық өнімдер мен құрылыс материалдары секілді халықтық қолданыстағы тауарлар импортталды.
Құрық портының келешегі зор деп есептеледі. Теңіз жолы арқылы қарым-қатынасты жолға қойып және оның бағыттары мен жүк көлемін жаңғыртып отыру – порттағы жемісті жұмыстардың бірі.
Маңғыстау облысы
