Күрделі кезең ұжымдық рухты күшейтті

Қаптаған шектеулерге қара­мастан, елдегі жүйеқұраушы кәсіп­орындардың жұмысын тоқтат­пай, экономикалық өсімді, әлеумет­тік дамуды қамтамасыз етті. Өзім еңбек ететін «Шығыс» кенішінде де сақтық шаралары қатаң бақы­ланып, еңбеккерлердің жауапкершілігі күшейді. Панде­мия бәріміз үшін үлкен сынақ болғаны анық. Біз соны еңсеріп, заманның ағымына сай бейімделе алдық. Ұжымдық күштің қандай болатынын осы кезеңде ерекше сезіндік. 

Президент Қасым-Жомарт Тоқаев Тәуелсіздік күні қарса­ңында өткен Мемлекеттік награ­далар тапсыру рәсімінде сөйлеген сөзінде қиындықтар мен ке­дер­гілерге қарамастан, алға ілгері­леуді жалғастырамыз деді. Бұл ретте, елімізді жаһандық дағда­рыстан алып шығу үшін көп іс тын­ды­рылғанын атап өту керек. Жүйелі жұмыстардың нәтиже­сінде экономикаға қатысты теріс бол­жам­дарды жоққа шығарып, індет­­тің зардабы азайды. Дер кезін­де қабылданған шара­лар­дың арқа­сында ахуал бірша­ма тұ­рақ­тан­дырылды. Жаһан­дық дүрбелең­ге қарамастан, мемле­кет­тің іргесі мығым, тұғыры бекем еке­нін дәлелдей білдік. Осының бәрі ортақ мақсат үшін жұды­рық­тай жұмылып, еңбек етудің жемісі.

Әлбетте, ел үшін азаматта­рым­ыздың денсаулығы, өмірі мен амандығы бәрінен қым­бат. Осы орайда қазақстандықтар мемлекет тарапынан шынайы қолдауға ие болды. Президент атап өткендей, 4 миллионға жуық азаматтың зейнетақысы мен әлеуметтік жәрдемақыларының көлемі ұлғайды. Әлеуметтік сақтандыру төлемдері орташа есеппен 50 пайызға көтерілді. Аз қамтылған отбасылардағы 500 мыңнан аса бала үшін кепілдендірілген әлеуметтік пакет енгізілді. Күрделі жағдайға тап болған адамдарға 42 500 теңге көлемінде тікелей төлемдер жасалды. 4,5 миллионнан аса азамат мемлекеттен қаржылық көмек алды. Несиелер бойынша ұсынылған төлемдерді кейінге шегеру шамамен 1 миллион 900 мың қазақстандықтың дефолтқа ұшырауына жол бермеді. Мұның бәрі үлкен көмек. Халық мемлекет қолдауын толықтай сезіне алды.

Әрине, ел іші қиын жағдайға тап болған шақта, «Қазақстанның Еңбек Ері» атандым деп қуануым қисынсыз. Десе де, еңбегімізді елеп-ескерген мемлекетімізге алғыстан басқа айтарымыз жоқ. «Шығыс» кеніші құрылған сәттен бастап, табан аудармай жұмыс істеп келемін. Бұл марапат – соның өтеуі, ұжымның ортақ жетістігі. Дәл мен жұмыс істейтін «Шығыс» кенішінен осыдан бес жыл бұрын алғашқы Еңбек Ері шыққан еді. Сол бақыт енді бізге бұйырыпты.  Біздің еңбек жолымыз көпшілікке, әсіресе өскелең ұрпаққа үлгі болса екен. Еліміз аман, жұртымыз тыныш болсын!

Мұрат ҚАЙЫРГЕЛДИН,

Қазақстанның Еңбек Ері

Павлодар облысы,

Екібастұз қаласы