Мерекелік лебіздер легі

Қытай Халық Республикасының Төрағасы Си Цзиньпин жеке өзінің және ҚХР Үкіметі мен халқының атынан Қасым-Жомарт Тоқаевты Қазақстан Тәуелсіздігінің 29 жылдығымен құттықтады.

– Өткен жылдың қыркүйек айындағы Сіздің Қытайға жасаған мемлекеттік сапарыңыз барысында қытай-қазақ қатынастарына мәңгілік, жан-жақты стратегиялық серіктестік мәртебесін беруге екіжақты келісім жасадық. Бұл екіжақты ынтымақтастықтың көкжиегін кеңейтеді. Мен Қытай-Қазақстан қатынастарын дамытуға баса мән беремін. Сонымен қатар екі елдің игілігі үшін бірлесіп жүзеге асырып жатқан «Бір белдеу – бір жол» бағдарламасы аясында жаңа жетістіктерге қол жеткізуге, өзара қолдауды нығайтуға және стратегияларды тереңдете отырып ұштастыруға Өзіңізбен бірлесіп күш салуға дайынмын, – делінген ҚХР Төрағасының жеделхатында. Сөз соңында Си Цзиньпин достас Қазақстанның қуаты артып, өсіп-өркендеуіне, ал халқына бақ-береке тілеген.

Жапония императоры Нарухито өзінің құттықтау хатында Қасым-Жомарт Тоқаевқа құт-береке, Қазақстан халқының өсіп-өне беруіне тілектестік білдірген.

Сауд Арабия Королі Салман бен Абдельазиз Әл Сауд және Сауд Арабиясы Корольдігінің Тақ мұрагері Мұхаммед бен Салман Әл Сауд Қазақстанның одан әрі дамып, гүлденуін тілеген.

Ұлыбритания Патшайымы ІІ Ели­завета Мемлекет басшысы Қасым-Жомарт Тоқаевты Тәуелсіздік күнімен құттықтады.

– Жоғары Мәртебелі Президент мырза, сіздердің ұлттық мерекелеріңізге орай жү­рекжарды құттықтауымды қабыл алыңыз. Сондай-ақ осындай қиын-қыстау кезеңде Қазақстан халқына бар жақсылықты тілеймін, – делінген жеделхатта.

Мереке қарсаңында Қазақстан Прези­дентінің атына Испания Королі Фелипе, Бельгия Королі Филипп, Марокко Королі VI Мұхаммед, Қатар Мемлекетінің Әмірі Тамим бен Хамад Әл Тәни, Оман Сұлтаны Хайсам Бен Тариқ, Камбоджа Королі Нородом Сиамони құттықтау хаттарын жолдады.

Өзбекстан Президенті Шавкат Мир­зиёев жеке өзінің және өзбек халқының аты­­нан Қасым-Жомарт Тоқаев пен қа­зақ­­стандықтарды ұлттық мерекемен құт­тық­тады.

– Қазақстан халқының әл-ауқатын арттыру және еліңіздің халықаралық аренадағы беделін одан әрі нығайту жо­лын­­дағы жетістіктеріңізге тату көрші­лері­ңіз ретінде ерекше қуанамыз. Әсіре­се жа­һандық пандемия жағдайында елі­ңіз­­дің экономикалық дамуын қамта­масыз етуге және оның салдарын жою­ға байланысты қабылдаған тиімді шара­лары­ңызға тәнтіміз. Соңғы жылдары екі ел арасындағы өзара тиімді және ұзақ мер­зімді қатынастарды нығайтуға бағыт­талған бірлескен іс-қимылдардың жандан­ғанын, сондай-ақ оның жаңа деңгейге көте­ріл­генін ерекше атап өткім келеді, – делін­ген Өзбекстан Президентінің жедел­хатында.

Тәжікстан Президенті Эмомали Рах­мон Тәуелсіздік күніне орай өзінің жүрек­жарды құттықтауын жіберді.

– Біз екі халық арасындағы берік, тарихи байланыстарды жоғары бағалаймыз. Өзара күш жұмылдыра отырып, тәжік-қазақ стратегиялық серіктестігін дәйекті, қарқынды дамыта аламыз деп сенемін, – делінген құттықтау хатта.

Түрікменстан Президенті Гурбангулы Бердімұхамедов жеке өзінің және түрікмен халқының атынан Тәуелсіздік күнімен құттықтап, Қазақстанның өсіп-өркендей беруіне тілектестік білдірді.

Түркия Президенті Режеп Тайип Ердоған Қасым-Жомарт Тоқаевты және Қазақстан халқын Тәуелсіздік күнімен құттықтап, табыс тілеген.

– Ортақ тарихи, мәдени және бауыр­ластық тамырымыз байланыстыратын Қазақстанмен арадағы стратегиялық серік­тестік деңгейіндегі қарым-қатынастардың жаңа салаларда да түрленіп, байи түскеніне қуаныштымыз. Қолайлы күні Қазақстанға са­пармен барып, Өзіңізбен бірге Жоғары дең­гейдегі стратегиялық ынтымақтастық ке­­ңе­­сінің отырысына қатысуға бейілді еке­­­нім­ді білдіремін, – делінген жеделхат­та.

Иран Президенті Хасан Рухани өзінің құттықтауында екі ел арасындағы қарым-қатынастардың күшейгенін, сондай-ақ, өзара ынтымақтастықты одан әрі дамытуға әлеуетіміздің зор екенін жеткізген.

Қазақстанның Тәуелсіздік күніне орай құттықтау жеделхаттарын Моңғолия Прези­денті Халтмаагийн Баттулга, Үндіс­тан Президенті Рам Нат Ковинд жолдады.

Корея Республикасының Президенті Мун Чжэ Ин мерекемен құттықтап: «Әр­түрлі саладағы ынтымақтастықтың арқа­с­ында екі ел арасындағы достық байла­ныс­тар қарқынды дамып келеді. Қазақ­станға былтыр жасаған сапарым екіжақты қатынастардың дамуына тың серпін берді. COVID-19 пандемиясына байланысты ахуал тұрақтанғаннан кейін Сіздің Корея Республикасына жасайтын сапарыңыз екі ел арасындағы стратегиялық серіктестікті одан әрі тереңдетіп, дамытуға мүмкіндік береді деп үміттенемін», деген құттықтау хатын жолдаған.

Украина Президенті Владимир Зе­лен­ский Мемлекет басшысы Қасым-Жомарт Тоқаевты Тәуелсіздік күнімен құттықтады.

– Тәуелсіздік жылдарында Қазақстан Республикасы Украинаның Орталық Азия­дағы сенімді серігіне айналды. Тәуел­сіз мемлекеттеріміз арасындағы екіжақ­­ты ықпалдастық өзара сенімге және елдері­міздің егемендігі мен жеріміздің бүтін­дігін сақтауға негізделіп, одан әрі дами бе­реді деп санаймын, – делінген жеделхатта.

Сонымен қатар Қазақстан Тәуел­сіз­­дігінің 29 жылдығына орай Қасым-Жомарт Тоқаевтың атына Грузия Прези­ден­ті Саломе Зурабишвили, Мажар­стан Пре­зиденті Янош Адер, Италия Пре­зи­ден­ті Серджо Маттарелла, Швейцария Президенті Симонетта Соммаруга, Поль­ша Президенті Анджей Дуда, Финлян­дия Президенті Саули Ниинистё, Сер­бия Президенті Александр Вучич, Израиль Президенті Реувен Ривлин, Литва Президенті Гитанас Науседа, Хорватия Президенті Зоран Миланович, Болгария Пре­зиденті Румен Радев, Молдова Пре­зиденті Игорь Додон, Мальта Президенті Джордж Велла, Сан-Мариноның Капитан-регенттері Алессандро Карделли мен Мирко Долчини, Куба Президенті Мигель Диас-Канель Бермудес, Египет Президенті Абдель Фаттах Ас-Сиси, Палестина Президенті Махмуд Аббас, Оңтүстік Африка Республикасының Президенті Матамела Сирил Рамапоза, Тунис Президенті Каис Саид, Сьерра-Леоне Президенті Джулиус Маада Био, Еуразиялық экономикалық комиссия алқасының төрағасы Михаил Мясникович, Шанхай ынтымақтастық ұйымының Бас хатшысы Владимир Норов, Ұжымдық қауіпсіздік шарты туралы ұйымның Бас хатшысы Станислав Зась, Ислам ынтымақтастығы ұйымының Бас хатшысы Юсеф әл-Осеймин, Экономикалық ынтымақтастық ұйымының Бас хатшысы Хади Сулейманпур, БҰҰ Бас хатшысының Орталық Азия бойынша арнайы өкілі Наталья Герман, Еуразиялық даму банкінің Басқарма төрағасы Николай Подгузов, ExxonMobil Global Projects Company Президенті Нил Даффин, Eni компаниясының Бас атқарушы директоры Клаудио Дескальци, Ресей Федерациясы Бірлескен ядролық зерттеу­лер институтының директоры Виктор Матвеев, Эстонияның Қазақстандағы елшісі Хейти Мяемеэс, Пенза облысының губернаторы Иван Белозерцев, Байқоңыр қаласы әкімшілігінің басшысы Константин Бусыгин өздерінің құттықтау хаттарын жолдады. 

Франция Президенті Эмманюэль Мак­рон елімізді Тәуелсіздік күнімен құттық­тап, Қазақстанның өсіп-өркендей беруін тілеген.

– Биылғы жыл біздің елдеріміздің бір-біріне жақындай түсуімен ерекшеленді. Мен бұған өте ризамын. Еуропа Одағы мен Қазақстан арасындағы Кеңейтілген ынтымақтастық және серіктестік туралы келісім 2020 жылдың 1 наурызынан бастап өз күшіне енді, – деп жазады Франция Президенті. Сондай-ақ ол Қазақстанның биыл өлім жазасын жоюды көздейтін Азаматтық және саяси құқықтар туралы халықаралық Пактінің екінші факультативті хаттамасына қол қойғанын, экономика саласындағы ынтымақтастық жөніндегі жол картасы бойынша жаңа жобалар пандемияның кесірінен кейінге шегерілгенімен, оның іске асырылуына қатысты жұмыстар жалғасып жатқанын атап өткен. Сонымен қатар Эмманюэль Макрон өз құттықтау хатында Нұр-Сұлтан қаласында француз білім беру мекемесін ашуға байланысты жобада ілгерілеу бар екенін жазған.

Әзербайжан Президенті Ильхам Әлиев те Тәуелсіздік күнімен құттықтап, жүрек­жарды тілегін жолдады.

– Қазақстан Республикасының мемле­кеттілігін нығайтып және халқының әл-ауқатын жақсартып, әлеуметтік-экономи­калық, мәдениет салалары бойынша дамуы, сондай-ақ еліңіздің халықаралық аренада абыройының артуы бізді қуантады. Біздің бірлескен күш-жігеріміздің арқасында Әзербайжан мен Қазақстан арасындағы достық пен ынтымақтастық өрістеп, біздің стратегиялық әріптестігіміз моральдық құндылықтары мен дәстүрі ортақ халқымыздың еркіне сәйкес одан әрі дами береді деп сенемін, – делінген құттықтау хатта.

Беларусь Республикасының Прези­денті Александр Лукашенко өзінің құт­тық­­тау хатында егемендік жылдары Қазақ­­станның әлеуметтік-экономикалық және гу­манитарлық салалар бойынша  айтар­лықтай дамығанын, халықаралық қоғам­дастық тарапынан мойындалғанын  атап өткен.

– Беларусь Қазақстанмен арадағы жылдан-жылға нығайып, жетілдіріліп, жаңа мазмұнға ие болып келе жатқан берік серіктестік байланыстарды шын мәнінде жоғары бағалайды. Мемлекеттеріміз арасында қалыптасқан өзара сенім, қолдау мен ашықтық қазіргі заманғы күрделі сын-қатерлерге бірге қарсы тұруға, беларусь-қазақ халықтарының игілігі жолындағы көпжақты және тиімді ынтымақтастықты кеңейтуге мүмкіндік беретініне сенімдімін,  – делінген Александр Лукашенконың хатында.

Армения Президенті Армен Саркисян Қасым-Жомарт Тоқаевтың атына жол­даған құттықтау хатында Мемлекет басшысының қызметіне табыс, Қазақстан халқына бейбітшілік, бақ-береке тілей отырып: «Армения Республикасы мен Қазақстан Республикасының арасындағы өзара сенім мен қолдауға негізделген ынтымақтастықтың екі халықтың игілігі үшін одан әрі дами беретініне нық сенімдімін», деп жазған.

Армения Премьер-Министрі Никол Пашинян Қазақстан тәуелсіздігін жа­рия­лаған кезден бері халықаралық аре­надағы орнын табысты нығайтып, сая­си және әлеуметтік-экономикалық салаларда айтарлықтай жетістікке жеткенін айтқан.

– Армения мен Қазақстанның достық қатынастары екі халықтың мүддесі үшін екіжақты форматта да, халықаралық ұйымдар мен интеграциялық бірлестіктер аясында да одан әрі дами береді деп сенемін, – делінген жеделхатта.

Сонымен қатар Қазақстанның Тәуел­сіздік күніне орай Мемлекет басшысы мен Қазақстан халқын ТМД Атқару коми­те­тінің төрағасы – Атқарушы хатшысы Сер­гей Лебедев, Ресей Федерациясы Сыртқы барлау қызметінің директоры Сергей Нарышкин құттықтап, бақ-береке тілеген.

Латвия Президенті Эгилс Левитс өз құттықтау хатында елдеріміз арасындағы екіжақты қарым-қатынастардың достық және сындарлы сипатын атап өткен.

– Ригада Қазақстан елшілігінің ашылуы екі ел арасындағы ынтымақтастықты одан әрі нығайту мақсатындағы маңызды қадам болды. Латвия мен Қазақстан арасындағы өзара іс-қимылды екіжақты ынтымақтастық шеңберінде, Еуропалық одақ пен Орталық Азиядағы келісім бо­йынша, сондай-ақ БҰҰ мен басқа да көп­жақты құрылымдар аясында кеңейте бе­реміз деп сенемін, – делінген жеделхатта.

Эстония Президенті Керсти Кальюлайд қазақстандықтарды Тәуелсіздік күні­мен құттықтап, екі ел ортасындағы ынты­мақ­тастық өзара табысты салалар бойынша одан әрі дами береді деп үміттенетінін жеткізген.

Румыния Президенті Клаус Вернер Йоханнис өз құттықтау хатында Қасым-Жомарт Тоқаевқа және Қазақстан халқына денсаулық, бейбітшілік пен амандық тілеген.

– Мен Румынияның  2003 жылы Астанада қол қойылған Серіктестік және ынтымақтастық туралы декларация негізінде біздің елдеріміз арасындағы екіжақты қарым-қатынастарды одан әрі дамытуға ниетті екенін нақтылаймын, – делінген жеделхатта.

Кипр Республикасының Президенті Никос Анастасиадис Қасым-Жомарт Тоқаевты және Қазақстан халқын Тәуел­сіздік күнімен құттықтады.

– Қазақстан COVID-19 пандемиясынан туындаған бұрын-соңды болмаған жаһандық қиындықтарға қарамастан, Өзіңіз бастамашы болған реформалар жолын одан әрі жалғастыра беретініне нық сенімдімін, – деп жазған Н.Анастасидис.