Демократиялық партияның кандидаттары елордалықтарды өздерінің сайлауалды бағдарламасымен таныстырып, сайлаушылардың сұрақтарына жауап берді.
Үгіт-насихат тобын бастап келген Дания Еспаева мен Сұлтан Хан Жүсіп Ұлттық кітапхана ұжымына «Түбегейлі өзгерістер қажет» сайлауалды бағдарламасы мен партия қызметі туралы айтып берді.
Кітапхана қызметкерлері «Ақ жолдың» әлеуметтік саладағы ұсыныстары мен бастамаларын ықыласпен қабылдады. Олардың айтуынша, Ұлттық кітапханада 140 адам жұмыс істейді, оның 40 пайызы – жастар. Қазіргі таңда тұрғын үй мәселесі өте өзекті болып отыр.
Сондықтан партияның жастарға арналған жатақханалар салу жөніндегі ұсынысы ерекше қолдау тапты. Жұмысшы жастарға қолдау көрсету, олардың әлеуметтік мәселелерін шешу арқылы еліміздегі жас азаматтар мен жас отбасылардың жағдайын жақсартуға мүмкіндік бар.
«Бұл жастарды қолдау үшін өте қажетті шара. Сондай-ақ біз сіздердің ипотеканы субсидиялау жөніндегі ұсыныстарыңызды да қолдаймыз», деп атап өтті кітапханашылар. Кездесуге қатысушылар ұзақ уақыттан бері салынып бітпеген үйлер, оның ішінде «Баспана Көктал» ТК құрылысы мәселесін де көтерді.
Сонымен қатар олар балалар кітапханаларының қажеттілігі туралы айтты. Бүгінгі таңда елімізде 256 балалар кітапханасы бар, олардың 7-еуі ғана арнайы мәртебеге ие.
Кітапхана қызметкерлерінің айтуынша, бұл тақырып ата-аналарды да, мұғалімдерді де мазалайды. Жалпы, өскелең ұрпақтың білім алуы мен сауатты болуы, оларды кітап оқуға қызықтыру секілді мәселелерді жаңа заманауи, оқырман сұранысына толықтай жауап беретін кітапханалар салу арқылы жүзеге асыруға болады.
Дания Еспаева кездесуге қатысушылардың көтерген барлық мәселелері назарға алынатынын және олар партияның алдағы жұмысында ескерілетінін хабарлады.
Осыған дейін жас «ақжолдықтар» әлеуметтік желілерде арнайы науқан бастаған еді. Онлайн-науқан партияның Маңғыстау облыстық филиалы жанындағы «Ақ жол» – жастар» жастар қанатынан бастау алды.
Желілердегі шара алдағы Парламент Мәжілісі мен барлық деңгейдегі мәслихаттар сайлауына бағытталған. «Ақжолдықтар» бейнероликте партия ұсынған өзгерістер және олардың қажеттілігі туралы еске салып, сайлауға белсенді қатысуға шақырды.
