Өткен ғасырдың 80-90 жылдары жалпы жұрт сол кездегі Целиноградтағы барлық жай-күйді, аймақтың тыныс-тіршілігі мен өлкедегі ана тіліміздің мүшкіл халін, өзге де түрлі проблемаларды «Ана тілі» газетінде жазылған Жұматай Сабыржанұлының мақалаларынан біліп, хабардар болып отыратын. Оқи отыра айыздары қанып, бірге жанып, бірге күйіп, бірге марқаятын. Сөз қасиетіне кір жұқтырмай, адалдықтан айнымай, жазғанының шындығына күмән тудырмай, жүрекпен жазып, жүректерге жол тапқан Жұматай Сабыржанұлының Нұр-Сұлтан қаласында тұрған үйі де қазақ жері үшін күресте алдаспандай жарқылдаған ардақты Жұмабек Тәшенов көшесінде болыпты.
Ескерткіш тақтаның ашылуында жазушы Жұмаш Сомжүрек: «Жұматайға орнатылған тақтаның Тәшеновтің көшесінде тұруының символикалық үйлесімі бар тәрізді. Тәшенов жердің тұтастығына, солтүстік аймақтың жатқа кетпеуіне басын тіксе, Сабыржанұлы өз дәуірінде ел, жер, тіл деп шырылдады, Тәшенов идеяларының жалғастырушысы болды».
Салтанатта сөз алған жазушы Қайсар Әлім: Кезінде Торғай облысы ашылғанда оның экономикалық және рухани-әлеуметтік дамуына атсалысқан қаламгер кейін Ақмола өңіріне келіп мұнда да жан аямай, сол баяғы күрескерлігімен, сындарлы сынының жебесін мүлт жібермей дөп тигізе тер төкті. Жұматайдың сол еңбегін Сафуан Шәймерденов, Сырбай Мәуленов, Ғафу Қайырбеков сынды қазақ әдебиетінің майталмандары бағалап жазды. Марқұмның көзі тірісінде бірнеше кітабы шықса, артында қалған мұрасын жары Әмина Міржүсіпқызы бірнеше кітап етіп көпшілікке жеткізді. Ол жүректерге Жұматайдың көзі тірісіндегідей жол тауып жатыр», деген.
Ашылу салтанатында қаламгердің бауыры Жомарт Сабыржанұлы, туысы Хамитбек Махмұтов сөз сөйлеп, Жұматай Сабыржанұлын есте қалдыратын шаралар жалғасты болса екен деген тілектерін айтты.
