6 қаңтардың түнінде №15 үйдің құбыры жарылып, жоғарыдан төменге аққан су тұрғындарды әуре-сарсаңға түсірген. 
— Кілтін былтыр 1 желтоқсан – Тұңғыш Президент күніне орай, облыс әкімі Даниал Ахметов өзі табыстаған еді. Күйеуіме балалар үйінің тәрбиеленушісі ретінде берілген болатын. Жалға берілетін пәтер болса да, шын қуандық. 6 қаңтар күні кешкісін қонақта болған едік. Төменгі қабаттағы көршілер бірінен соң бірі хабарласып, біздің пәтерден төменге су кетіп жатқанын айтты. Оқиға осы үйді салған «Азия» фирмасына да жетіпті. Фирманың техникалық директоры қоңырау шалып, бүлінген жиһазды, заттарды, еден төсеніштерін жаңартып беруге уәде берді. Дәл қазір баратын жеріміз жоқ, көршінің үйінде жүрміз, – дейді сәбиін қолына ұстаған Зарина.
Сонымен қатар, үйдің батарейлері де қан жылы. Аязды күндері үй іші аңырап кететін көрінеді. Аңырамағанда, уақыт өте қабырғалары жарыла бастаған. «Сапасыз үйге сапалы жөндеу керек» деседі тұрғындар бір ауыздан. Үйді салған фирма үш жыл кепіл бергенмен, кемшіліктер қашан, қалай жойылары белгісіз.
