Менің ойымша, «Егеменге» жазылу керек деп, оған жарнама жасаудың қажеті жоқ. Еліміздің бас басылымы мұндай жарнамаға зәру емес деп санаймын. «Егемен» онсыз да оқылады. Өйткені, мұнда оқымаса болмайтын, тіпті оқытпасыңа қоймайтын материалдар жеткілікті.
Менің ойымша, «Егеменге» жазылу керек деп, оған жарнама жасаудың қажеті жоқ. Еліміздің бас басылымы мұндай жарнамаға зәру емес деп санаймын. «Егемен» онсыз да оқылады. Өйткені, мұнда оқымаса болмайтын, тіпті оқытпасыңа қоймайтын материалдар жеткілікті.Тағы бір басын ашып айтатын мәселе «Егемен» тек бірыңғай егде тартқан адамдардың оқитын газеті десек, қателесер едік. Бұған қоса, бүгінгі жастар да газет беттерінен өздеріне қажетті танымдық және сараптамалық талдау тұрғысындағы сан алуан материалдармен таныса алады. Оның интернет-басылымына үңіліп, әлемде болып жатқан бірқатар оқиғалардың алдын орай отырып, шұғыл түрде берілген сайттағы сарабдал сөзіне де көз жүгірте алады.
Мемлекеттік деңгейде және республика аймақтарында толғағы жеткен мәселелерді түбірімен көтеріп, қопарып жазып жүрген бір басылым осындай-ақ болар. «Сын түзелмей, мін түзелмейді» дегендей, бас басылымның осындай парасатты да пайымды сынынан соң жұмысын ширатқан, сылбырлық пен енжарлықтан арылған жеке және заңды тұлғалар қаншама? Сондай-ақ, мұнда оқырмандар қызығып оқитын материалдардың бірі – жаһан жаңалықтары деген ойдамын. Егер алдағы жылдары редакция алқасы бұл тақырыпты одан әрі тереңдете жазуға тиісті қадамдар жасаса, оқырмандар аудиториясы қазіргісінен де кеңейе түседі демекпін.
Күн сайын 12-14 бет көлемі үлкен пішіммен шығатын «Егемен Қазақстан» газетінің жазылым бағасы ұзақ жылдар бойы өсірілмей бұрынғы күйінде қалды. Бұған оның тұрақты оқырманы ретінде айғақ, куә бола аламын. Қазіргі бағасы да әлдеқайда аз бетпен шығатын кейбір республикалық және облыстық басылымдар бағасымен өлшегенде біршама арзан. Менің ойымша, салмақты басылымның бағасы да салмақты болуы керек. «Арзанның тұзы татымас» демей ме халқымыз.
Оның үстіне «Егемен» республиканың барлық облыстарында басылатын болғандықтан сол күні тиетін, ал шалғайдағы аудандарға ертеңіне жететін елдің бірден-бір басылымы екенін ұмытпайық. Осы арқылы күн сайын қаншама өзімізге қажетті ақпараттар аламыз. Қаншама өзекті де көкейкесті тақырыптармен бетпе-бет келеміз. Тағы да қайталап айтамын, мұндай баға жетпес рухани дүниені жаздырып оқу – өзін қазақпын деген, ана тілін құрметтеген, ұлтының мүддесін діттеген әрбір азаматтың парызы.
Біржан КУХАЕВ,
«Ақжайық өрендері» жастар
қоғамдық бірлестігінің төрағасы.
Батыс Қазақстан облысы,
Ақжайық ауданы.
