Екі ұжым арасындағы алғашқы ойын өткен жылдың қазанында Нұр-Сұлтанда өтіп, сол бәсекеде қонақтар «Барысты» 5:4 нәтижесімен овертаймда қапы қалдырған болатын. Хельсинкиге елордадағы кеткен есені қайтаруға барған жерлестеріміз өз дегендеріне жетті. Бірінші кезеңде командалар бір-бірінің қақпа кілтін ұзақ уақыт таба алмады. Десек те 19-минутта «Барыстың» канадалық легионері Филип Вароне есеп ашты. Үзілістен кейін де екі жақ біраз тірескенімен, шайба соға алмады.
Үшінші кезеңде айдын иелерінен Алекс Грант (42-минут) есепті теңестіруге мүмкіндік алғанымен, бұл шайба «Йокериттің» осы ойындағы алғашқы және соңғы голы болды. Тең есепті қанағат тұтпаған жерлестеріміз қарқынын одан әрі күшейтті. Нәтижесінде, 51 және 56-минуттарда Кёртис Волк қарсыластың қақпасын екі мәрте дәл көздесе, 59-минутта Антон Сагадеев кездесудің нүктесін қойды. Осылайша, «Барыс» сырт айдында «Йокерит» ұжымынан есе қайтарып, 4:1 есебімен жеңіске жетті. Елорда командасы келесі кездесуін бүгін Мәскеуде «Динамо» клубымен өткізеді.
