Ел Тәуелсіздігіне орай «Қазақстан» ұлттық арнасы мерекелік бірнеше арнайы жоба әзірледі. Тәуелсіздік күні егемен Қазақстанның тарихынан сыр шертетін «Теңдессіз тәуелсіздік!», «Менің Отаным – Қазақстан», «Тұғыры биік тәуелсіздік!» атты деректі фильмдер көрерменге жол тартпақ. Және мерекелік концертпен қатар «Мемлекеттік қызметшілер миссиясы», «Баға жетпес байлығымыз оралды» атты арнайы жобалар ұсынылмақ.
Ел Тәуелсіздігіне орай «Қазақстан» ұлттық арнасы мерекелік бірнеше арнайы жоба әзірледі. Тәуелсіздік күні егемен Қазақстанның тарихынан сыр шертетін «Теңдессіз тәуелсіздік!», «Менің Отаным – Қазақстан», «Тұғыры биік тәуелсіздік!» атты деректі фильмдер көрерменге жол тартпақ. Және мерекелік концертпен қатар «Мемлекеттік қызметшілер миссиясы», «Баға жетпес байлығымыз оралды» атты арнайы жобалар ұсынылмақ.
Тәуелсіздік мерекесіне арналған бағдарламаның бірнешеуіне қысқаша тоқталып өтетін болсақ, алғашқы жобаның аты – «Теңдессіз тәуелсіздік!». 22 жылдық тарихы бар тәуелсіздік қазаққа оңай жолмен жеткен жоқ. Осы жылдарда Қазақ елі түрлі өзгерістерді бастан өткізді. Сын сағатта Қазақстан өзін 100-ден астам елге мойындатып, жаңа Ата Заңын қабылдады. 1998 жылғы азиялық дағдарыстан, 2008 жылғы әлемдік қаржы күйзелісінен де үлкен шығынсыз өтті. Егемен ел атанып, 5 Олимпиадаға ұландарын қатыстырды, байрақты талай бәсекеде қанжығасы бос қайтпай, ел туы жеңіс тұғырында желбіреді. Президент Н.Назарбаевтың бастамасымен еліміз бірнеше интеграциялық үдерісте белсенділік таныта білді.
Осы жетістіктерді 22 жылдан соң қорытындылап, түйін жасау – кейінгі ұрпақтың басты міндеті болып саналады. Осыған орай, «Қазақстан» ұлттық арнасы 3 бөлімнен тұратын 1 сағаттық «Теңдессіз тәуелсіздік!» атты арнайы жоба түсірді. Бағдарламада еліміздің басты оқиғаларына қатысты қоғам қайраткерлері сұхбат беріп, қызықты сюжеттер көрсетіледі. Мәселен, Премьер-Министрдің орынбасары Гүлшара Әбдіқалықова еліміздің ұзақ жылдар бойы үзілмей жалғасқан әлеуметтік саясаты жайлы баяндаса, ақын Әкім Ысқақ елімізге қандас бауырлардың оралуын еске алады. Ал белгілі тарихшы Бүркіт Аяған 90-жылдарғы қиындықтың себебін түсіндірсе, дипломат Вячеслав Ғиззатов мемлекеттік шекараларымыздың бекітілу хроникасын әңгімелеп береді. Ал мерекелік жобаның соңғы нүктесін дәстүрлі әнші Бекболат Тілеухан Елбасының сүйікті әндері жайлы сөз ете келіп, атақты «Менің Қазақстаным» әнін орындаумен түйіндейді.
Тәуелсіз тарихымызда Қазақстан үшін сын сәтіне айналған маңызды оқиғаның бірі – 2008 жылы бастау алған жаһандық қаржылық дағдарыс десек, осы кезде әлемде жүйе құраушы талай ірі банк, компаниялар өзін дефолт, банкрот деп жариялаған болатын. Дағдарыстың мұндай салқыны Қазақстанға да жетпей қоймады. Қаржы тапшылығы орнады. Бірақ 2000 жылы Президент бастамасымен құрылған Ұлттық қор қаражаты – мәселенің ең тиімді шешімі болды. Себебі, Елбасы мұнай сатылымынан түскен артық қаражаттың қиын сәтте қажет болатынын дер кезінде көре біліп, айтты. Дәл солай болды да.
Үкімет экономиканы тұрақтандырып, оның басты салаларын қаржыландыру үшін Ұлттық қордан 10 млрд. доллар алып, оны 5 салаға бөлді. Олар: қаржы нарығы, құрылыс саласы, агросектор, индустриялық жобалар және шағын және орта бизнес еді. Өзге елдерде жұмыс орны қысқарып, зауыттар жабылып жатқанда, мұндай қолдаудың нәтижесінде Қазақстан қызмет орындарын сақтап қала алды. Тіпті, күрделі жағдайда қалған үлескерлердің өтпей қалған құрылыс объектілерін бюджет есебінен тәмамдады. Нәтижесінде Қазақстан бар-жоғы 2-3 жылда өзінің бастапқы экономикалық өсіміне қайта оралды.
«Менің Отаным – Қазақстан» жобасына келсек, 1990-жылдардың басы. Аласапыран кезең. Бұл – егемендікті енді ғана алып, дербестікке қол жеткізген уақыт болатын. Нарықтық тұрмысқа әлі үйренісе қоймаған шақ. Бүтін бір мемлекет түгілі жекелеген азаматтың күнкөрісі мұңға айналған қиын-қыстау кезеңде жат жерде жүрген қандастарымызды атажұртқа шақыру расында, ердің ері ғана тәуекел ете алатын ісі еді. Президент Н.Назарбаев 1992 жылы осындай батыл қадамға барды. Сол кездегі астанамыз – Алматы қаласында Дүниежүзі қазақтарының алғашқы құрылтайы өзіндік сән-салтанатымен өткен болатын. Бұл құрылтай – дүние жүзіндегі иісі қазақ баласының рухани оянуына, қайта түлеуіне дем берді. Шарапатын тигізді. Үміт сыйлады. Бұл үміт кейін, шындыққа, ақиқатқа айналды. Үлкен тебіреніспен басталған құрылтай – Дүниежүзі қазақтарына және Қазақстан Үкіметіне бес баптан тұратын өз үндеуін жолдады. Бұл Қазақ елі үшін тарихи оқиға еді. Себебі, жаһанда қандас бауырларын тарихи отанына шақырған мемлекеттер некен-саяқ еді. Нақты айтсақ, мұндай батыл қадамға үш ел ғана бара алды. Олар – Германия, Израиль және біздің Қазақстан. Бұл жұмысты Қазақстан мен Израиль Тәуелсіздік ала сала, көп ұзамай қолға алды. Міне, осылайша Қазақстан басшысы Нұрсұлтан Назарбаевтың мұрындық болуымен тағы бір асыл арман – шындыққа айналды. Миллиондаған тағдыр, мыңдаған отбасы атажұртымен қайта қауышты. Бұл оқиға Қазақ елі тарихында алтын әріппен жазылатыны ақиқат.
Дүниежүзі қазақтарының қауымдастығын құрып, оған Елбасы Н.Ә. Назарбаевтың өзі Төраға болды. Сөйтіп, әлемнің әр тарабына тарыдай шашырап кеткен қандастарымыздың атамекенге оралуына заңдық және әлеуметтік негіз қаланды. Сол жылдардан бастап, Қазақстан Үкіметі көші-қон және демография мәселелерімен айналысатын арнайы агенттік құра отырып, шеттегі ағайындарды Отанға оралтуға бюджеттен квоталық қаржы бөлді, алыс-жақын шетелдерден қандастарымызды көшіріп әкелу мен орналастыру шараларын жоспарлы, кешенді түрде жүзеге асыра бастады. Содан бермен қарайғы 22 жылда алыс-жақын шетелдерден тарихи Отанына – Қазақстанға миллионнан астам қазақ баласы оралып үлгеріпті.
Тәуелсіздік ұлы мұрат, қастерлі ұғым! Сан ғасырлар бойы арман еткен ата-бабамыздың асыл мұраты осы дәуірде шындыққа айналуы қандай ғанибет! Қазақстан басшысы Нұрсұлтан Назарбаев ұлы мұраттың ұйытқысы бола білді. Елі сенді, Елбасы сенімді ақтады. Осылайша, қазақтың жаңа тарихы, жаңа жылнамасы жазылды. «Қазақстан» ұлттық арнасының арнайы мерекелік жобаларынан осындай ақшуақ әсерге бөленесіз.
Танагөз ІЛИЯСОВА.
