Қоғам • 22 Қаңтар, 2021

Жүрегі жұмсақ жетісулықтар

196 рет
көрсетілді
3 мин
оқу үшін

Жетісуда «Жақыныңа жанашыр бол» бастамасы аясында бірқатар жағымды іс атқарылды. Әсіресе, өткен жыл соңында мұқтаждарға жәрдемдесу мақсатында әр аудан мен қаланың өз мүм­кіндіктеріне қарай кө­мір мен отын сатып әперу, азық-түлік жағынан кө­мектесу, балаларға жаңа жылдық сыйлықтар, көп балалы және аз қамтылған отбасы балаларына қыстық киімдер, оқу құралдарын сыйлау, бір реттік қар­жы­лай қолдау сияқты бір­қатар қолдау шаралары жүзеге асқан.

Жүрегі жұмсақ жетісулықтар

Мысалы, Қапшағай қала­сында 1 600 отбасыға қажетті жәр­дем берілді. Мұндай көмек­ті негізінен меценаттар мен кә­сіпкерлер бизнестің әлеу­мет­тік жауапкершілігі аясында көр­сеткен. Оның ішінде демеу­шілердің қаржысына 700 көп балалы және аз қамтылған отбасына жалпы сомасы 5 млн 325 мың теңгеге азық-түлік берілген. Тағы 55 отбасыға 1 млн 540 мың теңгеге көмір түсіріп берген. Сол сияқты кәсіпкерлер мүмкіндігі шектеулі 700 балаға құны 2 млн 100 мың теңге болатын арнайы сыйлық үлестіріпті. Ал «Мейірімді адамдар» қайырымдылық шарасы шеңберінде тағы 200 отбасыға құны 2 млн теңге болатын азық-түлік пакеттері таратылған. Жал­пы Қапшағай қаласы бойынша былтыр 11 млн теңгеге жуық қайырымдылық шарасы жүзеге асыпты.

Бұл игі дәстүр Көксу ауда­нын­да да жалғасып, мұқтаж адам­дарға 2 млн теңгеден астам сомаға қайырымдылық көмегі көр­сетілді. Тиісті жәрдемге 72 отбасы қол жеткізген. Бұл ретте өңір меценаттарының көрсеткен қолдауы зор. Оның ішінде қалталы азаматтар бірігіп, Мұқаншы ауылындағы көп балалы отбасына 1 млн теңгеге үй сатып әпер­ген екен. Мұнан бөлек, ауданда демеушілердің қаржысына 41 аз қамтылған отбасыға жалпы сомасы 500 мың теңгеге азық-түлік беріліп, 40 отбасыға 550 мың теңгеге отын түсірілген.

Ал Ұйғыр ауданындағы «С.Абылай» шаруа қожалығының жетекшісі Сырым Жомартұлы Тасқарасу және Шарын елді мекендерінің орта мектебі мен ауруханасына қажетті құрал-жабдықтар сатып алып берген. Бұл тізімде 3 мың бетперде, дис­пенсерлік жабдық, тер­­мометр, залалсыздандыру сұ­йықтығы мен медициналық қол­ғап сияқты қажетті құралдар бар. Сонымен қатар тұрмысы төмен 25 отбасыға көмір түсіріп беріпті.

Жалпы, осы бастамаға бойын­ша облыстың барлық өңірі бел­сене атсалысты. Ал қайы­рым­ды­лық шарасына бюджеттен 46 млн теңге, демеушілердің қа­ражатынан 272,4 млн теңге қар­жы жұмсалды. Нәтижесінде, ай­мақта 18 мыңнан астам адамға нақ­ты көмек көрсетілді.

 

Алматы облысы