Павлодарлық жас жігіт анасының емделуіне ақша аударуды өтінген. Көбіне алданып қалғандардың басым көпшілігі қыздар болған. Полицияның мәліметінше, сот оған қатысты 3,6 жылға бас бостандығынан айыру және 100 сағат мәжбүрлі еңбекке тарту туралы үкім шығарған.
Қылмыстық іс материалдары бойынша жас жігіт Instagram желісіндегі парақшасында өзінің Ресейде екенін, ал науқас анасы Екібастұзда тұратынын және оған емделу үшін шұғыл ақша керегін хабарлаған.
«Алаяқ Instagram желісінде жалған парақшалар ашып, негізінен, қыздармен танысқан. Кейін анасының емделуіне ақша аударуды өтініп, қыздардан банк шоттарының деректемелерін және жеке деректерін беруді сұраған. Алынған мәліметтер бойынша онлайн-несие ресімдеген», деді Павлодар облысы полиция департаменті бастығының орынбасары Ельдар Әбдікенов.
Полицияның мәліметінше, Павлодар тұрғыны 92 қазақстандықты алдаған.
