Қазақстан • 26 Қаңтар, 2021

Сенаторлар ЕАЭО аясында бірқатар құжаттарды ратификациялау туралы заң жобаларын қарады

2 рет көрсетілді

Бүгін Сенаттың Экономикалық саясат, инновациялық даму және кәсіпкерлік комитетінің кеңейтілген отырысы болды. Онда депутаттар Еуразиялық экономикалық одақ аясында қолданыстағы бірқатар хаттамалар мен келісімдерді ратификациялауды талқылады.

Заң жобаларының бірінде құпия ақпаратты қорғау тәртібі және оны жария еткені үшін жауапкершілік туралы келісімге Армения Республикасының қосылуын заңды ресімдеу көзделіп отыр. Бұл Еуразиялық экономикалық комиссияның бәсекелестіктің бірыңғай қағидаларының сақталуын бақылауды жүзеге асыруы кезінде ерекше маңызды.

«Армения Республикасының келісімге қосылуы трансшекаралық нарықтардағы бәсекелестіктің жалпы қағидаларының бұзылуы туралы өтініштерді қарау, тергеу жүргізу және істерді қарау барысында Еуразиялық экономикалық комиссияның және Еуразиялық экономикалық одаққа мүше мемлекеттердің монополияға қарсы органдарының барлық лауазымды тұлғалары мен қызметкерлеріне құпия ақпаратты жария еткені үшін жауапкершілікті тең дәрежеде қарастыруға мүмкіндік береді»,-деп атап өтті комитет төрағасы, сенатор Дәурен Әділбеков.

Отырыста сондай-ақ ЕАЭО мен Сербия Республикасы арасындағы еркін сауда туралы келісімді ратификациялауға қатысты заң жобасы қаралды. Ол қабылданғаннан кейін Сербиядан ЕАЭО елдеріне және керісінше кейбір тауарларды әкелуге кедендік баждар алынып тасталады, сондай-ақ бірқатар жүктерді бажсыз әкелуге квоталар беріледі.

Сенаторлар отырыстың қарауына "2014 жылғы 29 мамырдағы Еуразиялық экономикалық одақ туралы шартқа өзгерістер енгізу туралы хаттаманы ратификациялау туралы" заң жобасын да енгізді.

«Онда ЕАЭО шартының терминологиясы нақтыланады, сондай-ақ аванс төлемдерді кедендік әкелу, арнайы, демпингке қарсы, өтемақы баждарын төлеу есебіне есепке алу мүмкіндігіне қатысты олқылықтар жойылады», - деп атап өтті Сенат депутаты Ләззат Рысбекова.

Соңғы жаңалықтар

Әулие ата һәм ұлы жырау

Руханият • Кеше

Ұқсас жаңалықтар