Елімізде мұндай 8 зертхана бар екен. «Ұлттық сараптама орталығының» орталық аппараты соның бірін Қостанай облысына жіберіп отыр.
"25-қаңтардан бері Денисов ауданындамыз, мұнда 27 қаңтарға дейін
боламыз. Басты мақсатымыз – Жітіқара, Қамысты, Денисов аудандарының ауруханаларынан әкелінген COVID-19 сынамаларына зерттеу жүргізу. Жітіқара ауданында біздің екі вирусолог дәрігеріміз іссапарда жүр. Олар зерттеу жұмыстарын жүргізіп, жергілікті дәрігер-лаборанттарды зерттеу дағдысына үйретеді. Өйткені Денисов ауданынан кейін зертхана кешені Жітіқараға бет алады", деді ұлттық сараптама орталығы облыстық филиалының директоры Бауыржан Көпжасаров.
КамАЗ зауытында жасалған тіркемесі бар жылжымалы зертхана кешені тәулігіне 300-ге дейін зерттеу жүргізе алады. Көлік-зертхананың өзінде ДНК және РНК жасушаларын автоматты түрде анықтайтын құрылғылар орналасқан бірнеше бокс бар. Ал тіркемесінде дәрігерлерге арналған ас бөлмелесі мен тынығу бөлмесі орналасқан.
"Біздің мамандарымыз Алматы қаласында арнайы даярлықтан өтті.
Одан кейін дәрігерлер лабораторияда қалай жұмыс істеу керектігін үйренді. Жылжымалы кешен жұмыс істеуге өте ыңғайлы", деді вирусология зертханасының меңгерушісі Қарлығаш Кенжебаева.
