Өз кезегінде аталған мəселелер санатория мен курорттағы демалысқа, медициналық туризмге деген сұранысты арттырып, дамытуға мүмкіндік береді. Еліміз өзінің бірегей табиғи ресурстарын пайдалану арқылы коронавирустан кейін оңалту бойынша санатория мен курорттағы демалысты ұйымдастыру жағынан ТМД-да көшбасшысы атана алады. Қолайлы климаттық жағдай, минералды су жəне шипалы балшықпен емдеу орны бар еліміздің барлық өңірі емдеу-сауықтыру саласының дамуына ықпал етеді.
Бұл салаға деген сұраныстың артуына байланысты Қазақстан Республикасының ұлттық курорт қауымдастығы санатория мен курорт объектілерін зерттей келе, COVID-19-ға шалдыққан адамдарды оңалту бағдарламасы бар 10 үздік санаторийді анықтады.
Мәселен, «Сарыағаш» курорт аймағындағы санаторийлердің ішінде коронавирустан кейін оңалту бағдарламасын ұсынатын ең үздігі – «Алтынай» мен «Қазақстан KZ». Сонымен қатар бұл тізімге Түркістан облысындағы «Манкент» шипажайы, Жамбыл облысындағы Merke Radon санаторийі, Жамбыл облысы әкімдігінің денсаулық сақтау ШЖҚ «Айша-бибі» МКК санаторийінің оңалту орталығы кіреді.
Ұлттық курорт қауымдастығының тізіміндегі санаториялар мен курорттар мыналар:
Алматыда – «Қазақстан» санаторийі және Altyn Kargaly қонақ үй-санаторийі;
Алматыдан үш шақырым жерде, Іле Алатауының етегіндегі – Almaty Resort санаторийі;
Ақмола облысында – «Оқжетпес» емдеу сауықтыру кешені;
Батыс Қазақстан облысында – Nurbergen Health Resort санаторийі және Ақтөбе облысында – «Шипагер» санаторий – профилакториі.
Айта кетейік, Kazakh Tourism ұлттық компаниясы Қазақстан Республикасының ұлттық курорт қауымдастығымен бірлесіп, курорттық аймақтардың инфрақұрылымын және материалдық-техникалық жарақтандырылуын ескере отырып, санаториялар мен курорт объектілеріне зерттеу жүргізді. 173 санаторий мен курортты қамтыған инспекция қорытындысы бойынша жаңартылған тізім, санаторийлер каталогы əзірленді.
www.kazakhstan.travel порталына жұмыс істеп тұрған санаторийлер жайлы өзекті ақпарат орналастырылды. Сондай-ақ арнайы бейнеролик жарық көрді.
