Жерлесіміз аталған турнирде украиналық Денис Молчановпен жұп құрап, финалда осы жарыстың бірінші ракеткалары саналған венесуэлалық Луис Давид Мартинес пен испаниялық Давид Вега Эрнандес жұбымен бас жүлдені сарапқа салды. Тартысты өткен бәсекенің алғашқы партиясында Мартинес пен Эрнандес 6:3 есебімен басым түскенімен, екінші партияда қазақ-украин жұбы 6:4 нәтижесімен қарымта қайтарды. Ал тай-брейкте Недовесов пен Молчановтың бағы жанып, 18:16 есебімен жеңісті жұлып алды.
Осылайша 33 жастағы А.Недовесов қазақстандық теннисшілер арасынан жаңа жылдағы алғашқы ірі жеңісіне қол жеткізді. Бұл – оның жұптық жарыс бойынша «Челленджер» турнирлеріндегі 16-шы табысы. Айта кетейік, жарыстың жүлде қоры – 44 мың АҚШ долларын құрайды.
