Аймақтар • 04 Ақпан, 2021

Жиһаз жасайтын жаңа цех

15 рет көрсетілді

Жұмыссыздықты азайту мен ауыл кәсіпкерлігін дамытуға бағытталған мемлекеттік бағдарламалардың қарқынды жүргізілуінің нәтижесінде аудандарда шағын кәсіпкерлік түрлері арта түсті.

Ақтөбе облысында кәсіпкерлік нысан­дарының көбеюі жағынан Мұғал­жар ауданы көш бастап келеді. Қазіргі уақытта мұнда 3 мыңнан астам кәсіпкер тіркелген. Ауданда «Бизнестің жол картасы – 2025» бағдарламасымен 1,5 млрд теңгеге 21 жоба мақұлданып, «Қарапайым заттар экономикасы» бағ­дар­ламасы бойынша 11 ірі жоба іске асып жатыр. Нәтижелі жұмыс арқылы ауданда тіркелген шағын және орта кәсіпкерлік нысандары өткен жылы 104 %-ға өскен.

Ғалым Айтымбетов өткен жылдың соңында аудан орталығы Қандыағаш қаласында жиһаз жасайтын цех ашқан болатын. Аз уақыттың ішінде Ғалымның цехы қанатын кеңге жайып, қазір 12 азаматқа тұрақты жұмыс тауып беріп отырған өндіріс орнына айналды.

– Жұмысқа кіріскенімізге көп уақыт өте қоймаса да, тапсырыс өте көп болғандықтан, бастапқыда екі-үш адаммен жұмыс көлемін игеру өте қиынға түсті. Сол себепті жан-жаққа сұрау салып, 12 адамды жұмысқа қабылдадық. Қазір олардың еңбекақысы 150-200 мың теңге аралығында. Жұмыс көлемі көбейсе, еңбекақы да артады. Әрине, жұмыскерлерден ең бірінші талап етілетіні – алған тапсырысты дер кезінде сапалы орындау ғана. Осы талаптан шыққан мамандарымыз қалады, ал міндетіне жүрдім-бардым қарағандарға бізде орын жоқ, – дейді Ғ.Айтымбетов.

Кәсіпкер жеке кәсібін ашуға кездей­соқ келген жоқ. Ол 2000 жылы осы аудан­ның Ақкемер елді мекеніндегі үйдің бір бөлмесінен қолда бар құралымен жиһаз жасауды бастаған еді. Аз уақыттың ішінде Ғалымның шеберлігі Ақкемер ауылынан асты. Ақтөбе қаласынан, Байғанин, Темір, Шалқар аудандарынан тапсырыс көптеп түсе бастағанда, кәсі­бін кеңейтудің төте жолы – Қандыағаш қаласында жиһаз жасайтын жаңа цех ашу деп түсінді. Осы іске бел байлаған кә­сіп­кер өткен жылдың басында «Қара­пайым заттар экономикасы» бағ­дарламасы шеңберінде жеңілдетілген несие алуға құжаттар әзірледі. 20 млн теңге қаржыға қол жеткізген соң жиһаз цехының құрылысына кірісті. Бес ай ішінде өндіріс орнын талапқа сай жабдықтап, жиһаз жасауға қажетті жаңа жабдықтарға тапсырыс берді. Қазір Ғалымның цехы Қандыағаш қаласындағы ең таңдаулы жиһаз жасайтын орынға айналды. Шикізатты сырттан тасығанды аса ұнатпайтын кәсіпкер отандық өнімді пайдаланады. Жиһаз ағаштарын Қостанайдан алдырса, басқа керек-жарақтарды өздері-ақ жасап алып жүр. Өйткені Ғалымның жұмыскерлерінің арасында темірден түйін түйген шеберлер де бар.

 

Ақтөбе облысы,

Мұғалжар ауданы

Соңғы жаңалықтар

Ұқсас жаңалықтар