Бас санитарлық дәрігердің айтуынша, вакцина алған адамдардың жағдайы жақсы, ешбір өзгеріс байқалмайды. Екпе ектіру үшін келгендердің бәрі екпені алмас бұрын арнайы медициналық байқау кабинетінде дәрігерлік тексеруден өтіп, сауалдама толтырып, екпеге өз еркімен келгенін растайтын құжатқа қол қойыпты. Тексерістен өткен соң, ресейлік «Спутник V», яғни ғылыми-фармацевтикалық атауы «Гам-ковид-вак» вакцинасын алды. Бір құты бес адамға дейін беруге жетеді. Екпе арнайы мұздатқышта белгіленген температурада сақталып, бөлме температурасымен ерітіліп, бірден беріледі.
Сонымен бірге үш күн бойы учаскелік дәрігерлер вакцина алған адамға хабарласып, жағдайын біліп тұруы қажет. Егер індетпен ауырып тұрған адамдар болса, олар жарты жыл бойы вакцина алмаулары тиіс. Қазақстандық вакцина болсын, ресейлік болсын құрамы бір. Сондықтан қайсысын алса да адамда індетке қарсы иммунитет болады. Вакцина 18 бен 60 жасқа дейінгі адамдарға ерікті түрде беріледі. Жүкті және бала емізетін әйелдерге екпе алуға тыйым салынады. Вакцинаны алған адам көпшілік жерге бармай, өзін оқшаулағаны абзал.
Бірінші күні вакцинаны 120 адам алды. Бұл ресейлік «Спутник V» препараты көрші мемлекетте жаппай егіліп жатыр. Облыстық көпбейінді ауруханасының бас дәрігері Нұрлан Жаровтың айтуынша, вакцинаны ауруханада вирусты жұқтырып алу қауіптілігі жоғары медицина қызметкерлері алады. Аурухананың 73 қызметкері аталған екпені ерікті түрде алыпты. Вакцина егетін қызметкерлер алдын ала оқытылып, препаратты сақтап, қолданудың талаптарын сақтаған.
– Мен коронавируспен ауырған жоқпын, сондықтан оған қарсы иммунитет қалыптастыру үшін вакцина алуға бел будым. Бұл екпенің басқа екпелерге қарағанда ешқандай айырмашылығы жоқ. Жыл сайын тұмауға қарсы екпені баршамыз алып жүрміз. Басқа да ауруларға қарсы екпелерді алуға учаскелерімізге барамыз. Екпеден кейінгі жағдайым жақсы. Мен өзім мамандығым бойынша мал дәрігерімін, сондықтан иммунитет қалыптастыру үшін не керектігін жақсы білемін. Бұл вакцина баршамызға керек деп ойлаймын, – деді облыс әкімінің орынбасары Ғалымжан Әбдіхалықов.
Сонымен бірге Көкшетау қалалық №1 емханасында да екпе егу басталды. Бұл жерде облыстық денсаулық сақтау басқармасы басшысының орынбасары Нариман Сыздықов бастаған ондаған адам коронавирус жұқпасына қарсы екпе алды.
Ақмола облысы
