Экипаж құрамында реаниматолог-анестезиолог Ермек Бекетаев пен Шығыс Қазақстан облыстық санитарлық авиация бөлімінің фельдшері Антон Волков болған. Айтуларынша, медициналық бригада Зайсан қаласында инсульт алған әйелге көмек көрсету үшін ұшып бара жатқан.
Индустрия және инфрақұрылымдық даму министрлігі оқиғаны растап отыр. Абырой болғанда, экипаж мүшелерінің ешқайсысы зардап шекпеген. Ал ұшақ «Навигатор» ЖШС-не тиесілі.
– Зардап шеккендер жоқ. Ұшаққа да зақым келмеді. Бортта үш экипаж мүшесі мен екі медицина қызметкері болған, – деп хабарлады министрліктен.
Күні кеше «Жедел жәрдем» көлігі жол көлік апатына ұшырап, шығыс өңір тұрғындары қос бірдей медицина қызметкерлерінен айырылған. Енді міне, ұшақтан ақау шығып, тағы да ақ халаттылар жазым бола жаздады. Алайда «Құдай сақтанғанды сақтайды» деген тәмсіл бар емес пе?! Осындай оқыс жағдайды болдырмау үшін қандай шаралар қабылданады деп Шығыс Қазақстан облыстық денсаулық сақтау басқармасына хабарласқанбыз.
– Қазір санитарлық ұшақтардың техникалық мәселесін айтып, Денсаулық сақтау министрлігіне хат дайындап жатырмыз. Өйткені қадағалауды республикалық «Санитарлық авиация» мекемесі жүргізеді, – деді Денсаулық сақтау басқармасының басшысы Жайық Жұмаханов.
Еске салсақ, бұл – Шығыс Қазақстан облысында АН-2 санитарлық авиациясының қатысуымен болған төртінші төтенше жағдай.
Тура бір жыл бұрын, 26 ақпанда Өскеменнен шыққан ұшақтың қозғалтқышы істен шығып, қалың қарға құлаған. Ол кезде санитарлық ұшақ Тарбағатай ауданы, Ақсуат ауылындағы 4 айлық нәрестені облыс орталығына жеткізу мақсатында ұшып шыққан еді. Әйтеуір, ол кезде де медицина қызметкерлері мен экипаж мүшелері аман қалған.
Қашанғы ақ халаттылардың өмірін қатерге тігеміз?! Науқас тасымалдауға арналған ескі ұшақтар тізімнен шығарылып, жаңартылатын уақыты жеткен шығар.
Шығыс Қазақстан облысы
