Суретті түсірген Ерлан ОМАР, «ЕQ»
Кейбір ел құлақ аспай жүрген негізгі ереже тым қарапайым – маска тағу, ара қашықтықты сақтау. Бар болғаны осы. Денсаулық әркімнің өзі үшін керек. Мұндай ескертуді айтудай-ақ айтып жатыр. Бірақ тәртіпті сақтайын десе де, сақталмайтын жағдайлар бар. Мәселен, қалалық автобустар ішіндегі иін тірескен жолаушылар маска таққанымен ара қашықтықты қайтіп сақтайды? Облыс әкімі Даниал Ахметов те вирустың қоғамдық көліктерде жұғатынын айтқан. Рас, бұл жерде санитарлық талаптарды сақтау мүмкін емес.
– Қоғамдық көліктерде ара қашықтық туралы айтудың өзі күлкілі. Автобустарда таңертең және кешке ине шаншар орын болмайды. Жолаушылардың ішінде жөтеліп-жөткірініп келе жататындары қаншама?! Қызық, ауа жоқ автобуспен жұмысқа жеткенде дене температурамызды тексереді. Банк сияқты қызмет көрсету мекемелерінде ара қашықтық ұстауымызды сұрайды. Бейнебір вирус қоғамдық көлікте жүрмейтін сияқты. Бәрі көзбояушылық, – дейді Өскемен қаласының тұрғыны Ринат Әділбек.
Кейбір жағдайға көз жұма қарағанның өзінде соңғы тәулікте 30-дан астам тәртіп бұзушылық тіркелген. Елдің берекесін қашырған кеселдің алдын алу үшін облыстық санитарлық дәрігер бекіткен шектеу режімінің сақталуы күнделікті мониторингтік топтың назарында. Ал арнайы құрылған мониторингтік топтың жұмысын «Шығыс – адалдық алаңы» жобалық кеңсесінің өкілдері қадағалайды.
– «Шығыс – адалдық алаңы» жобалық кеңсесінің нөміріне күн сайын ереже бұзылғандығы жөнінде ақпараттар түседі. Біз мониторингтік топтың жұмысында «бармақ басты, көз қыстылықтардың» болмауын қадағалаймыз. Ал далада, шағын дүкендерде маска тақпағаны үшін айыппұл салуды құптамаймын. Біз қоғам өкілі ретінде үлкен кәсіпкерлік нысандарындағы заңбұзушылықты міндетті түрде тіркеп, қандай айыппұл салынғанын тексеріп отырамыз. Бұл бір жағынан жемқорлықтың да алдын алады, – дейді «Шығыс – адалдық алаңы» жобалық кеңсесінің жетекшісі Маржан Бақытқызы.
Облыс орталығы Өскеменде мониторингтік топ 6 ақпанда дүкендерде маскалық режімді бұзу бойынша 6 жағдайды тіркеген. Ал Семей қаласының сауда үйлерінде, базарлар мен қоғамдық көліктерде маскалық режімнің сақталмауына байланысты 21 тәртіп бұзушылық анықталған. Сонымен қатар, 12 хаттама толтырылып, 393 795 теңге көлемінде 9 айыппұл салынды.
Риддер қаласында келушілерге маскасыз қызмет көрсеткендері үшін 4 тәртіп бұзушылық тіркелген. Зайсан қаласындағы сауда үйінде 12 адамға арналған семинар ұйымдастырылып, санитарлық талаптар бұзылғаны белгілі болып, жауапты азамат 15 АЕК көлемінде айыппұл арқалады.
Енді мына мәселеге мән берейік: Күршім ауданында маскалық режімді сақтамау фактілері тіркеліп, тәртіп бұзғандарға қатысты хаттамалар толтырылды. Глубокое ауданында В.Гуляшев есімді тұрғынға маскасыз жүргені үшін 43 755 теңге көлемінде айыппұл салынды. Олар қарапайым тұрғындар болса керек, қалтасы 43 755 теңгені көтере ме, жоқ па? Ал Тарбағатай ауданында аудандық мәслихаттың бірінші сессиясында депутаттар мен аудан әкімі маскасыз, ара қашықтықты сақтамастан естелік суретке түскен. Сурет аудандық газетке жарияланған. Демек санитарлық талаптар бұзылды. Ереже бірдей, заң ортақ. Қарапайым тұрғынға салынған айыппұл депутатқа да салыну керек емес пе?
Облыстық санитариялық-эпидемиологиялық бақылау департаменті мамандарының хабарлауынша, санитарлық-эпидемиологиялық саламаттылығы саласындағы заңнама талаптарын, сондай-ақ әлеуметтік қашықтық пен маскалық режімді сақтамай, гигиеналық нормативтерді бұзғаны үшін ҚР ӘҚБтК-нің 425-бабының 1-бөлігі бойынша 21 адам әкімшілік жауапкершілікке тартылған. Аталған адамдар өз кінәсін мойындап, заңда белгіленген мерзімде ерікті түрде әкімшілік айыппұл төлеген. Олай болса, тарбағатайлық депутаттарға да шара қолданылуы тиіс.
– Барлық жеке және заңды тұлғалар санитарлық шектеулерді сақтауы керек. Кемінде 2 метр қашықтықты, маскалық режімді сақтау және қоғамдық орындарға барғаннан кейін қолды өңдеу қажеттілігі туралы тағы бір мәрте естеріңізге саламыз, – дейді Санитарлық-эпидемиологиялық бақылау департаментінің жұртшылықпен байланыс жөніндегі бас маманы Бағлан Тауанова.
Олай болса, қарапайым ереже есте жүрсін. Ауырып ем іздегенше, ауырмаудың жолын ұстанған жөн. Вирус шенді-шекпенді деп талғамай жұғатынына көз жеткіздік емес пе?! Түптеп келгенде, айыппұлдан емес, індеттен сақтанғанымыз дұрыс.
Шығыс Қазақстан облысы
