Суретті түсірген Тілеубек Шаяхмет
Салтанатты шарада облыс әкімі Даниал Ахметов Президент Қасым-Жомарт Тоқаевтың шешімімен биыл Тәуелсіздіктің 30 жылдығы деп жарияланғанын айтып, осы кезең ішінде Қазақстанның әлемдегі дамыған елу елдің қатарына еніп, халықаралық қауымдастықтың тең дәрежелі мүшесіне айналғанын атап өтті. Сонымен қатар ол Қазақстанның жеткен жетістіктерін Тұңғыш Президент – Елбасы есімімен тығыз байланыстырып, алдағы мерейтой ең алдымен ауызбіршілігіміздің мерекесі екенін айрықша сөз етті. Себебі қоғамда орныққан тұрақтылық, өзара келісім мен ортақ мүдде жолындағы жасампаз еңбек қарқынды дамуымыздың негізі әрі кепілі болып отыр.
– Тағдыр біздің ұрпаққа тәуелсіздікке қол жеткізу бақытын сыйлап, оны көздің қарашығындай сақтауды аманат етті. Тарихи міндетті абыроймен іске асыру – баршамыз үшін қасиетті парыз. Осы жолда сіздерге толайым табыс, ынтымақ пен береке тілеймін! Мемлекет тұғыры берік, ел рухы биік, Тәуелсіздіктің 30 жылдық мерейтойының салтанатты ашылуы құтты болсын! – деді аймақ басшысы.
Салтанатты шара шағын концертпен жалғасын тапты. Сахна төріне «Алтай», «Пируэт» би ансамбльдері шықты. «Ан Сал Дар» әншілер тобы Тұңғыш Президент Нұрсұлтан Назарбаевтың сөзіне жазылған «Отан Ана» әнін орындады, балалардың «Инкоро» және «Іңкәр» топтары Елбасының сүйіп айтатын «Ауылым» әнін тамылжыта шырқады, балалар хоры мен «Флеш» заманауи би тобы «Қазақстан балалары» қойылымын ұсынып, өнерлерін көрсетті. Салтанатты шара соңында бүкіл өнерпаз залдағы көрермендермен бірге Әнұранды шырқады.
Атап өтерлігі, елдегі жағдайға байланысты 510 адамға арналған залдағы салтанатқа 50 адам қатысты. Олардың барлығы іс-шара басталар алдында экспресс-тест тапсырды.
Шығыс Қазақстан облысы
