Өңірде коронавирус індетіне қарсы екпе салу жұмыстары 20 емханада жүргізілуде. Вакциналарға арналған мұздатқыш камералары жеткілікті. Бүгінде вакцина егілген азаматтардың денсаулығы жақсы. Екпеден кейін ауруханаға түскен жағдайлар тіркелмеген. Пандемия басталғалы бері өңірде індет жұқтырудың 4 176 жағдайы тіркелсе, оның 2 682-сі симптомсыз, 1 671-і стационарлық ем қабылдады. Бүгінде 103 адам инфекциялық және карантиндік жағдайда емделуде. Өткен тәулік ішінде облыс бойынша коронавирус инфекциясын жұқтырудың 12 жағдайы расталды. COVID-19 инфекциясының күнделікті өсу деңгейі 0,28% төңірегінде. Айта кетейік, «жасыл аймақтағы» облыс аумағында 610 инфекциялық және 340 карантиндік орын дайын. Вирустың өршуі орын алған жағдайда, оның санын 6 мыңға дейін көбейтуге мүмкіндік бар.
Эпидемиялық ахуалды бағалау көрсеткіші бойынша «жасыл аймақта» тұрған облыста мамандар Мен жауапты мекемелер тарапынан осы түсте қалудың барлық амалы жасалуда. Әрине, «жасылда» қалу үшін жұрт болып карантин талаптарын сақтау қажет. Алайда ауылдарда «бата көкпар» ұйымдастырып, құдалық өткізу тыйылмай тұр. Мейрамханалардың есігі жабық болғанымен, бүгінде «қыз ұзату», «беташар» сынды тойлар «үйішілік» және «аулалық» деңгейге көшкен. Қазіргі таңда облыс бойынша 104 мобильді мониторингтік топ жұмыс істеуде. Мобильді топ құрамымен жұмыс істеуіне рұқсат етілген 13 812 нысанның 998-інде карантин талаптарын бұзушылық анықталып, хаттама толтырылған. Оның ішінде, 969 жеке тұлғаға – 30 АЕК, 3 лауазымды тұлға мен 25 жеке кәсіпкерге – 230 АЕК, 1 заңды тұлғаға 1600 АЕК мөлшерінде айыппұл салынды.
Түркістан облысы санитариялық-эпидемиологиялық бақылау департаментінің басшысы Нұрбек Нышановтың мәлімдеуінше, аурушаңдық өткен қараша, желтоқсан және қаңтар айларында тиісінше 65, 192 және 427 жағдайдан тіркеліп, өсу үрдісі байқалғанымен, соңғы 2 апта көлемінде эпидемиялық жағдай едәуір тұрақталған. Індеттің тіркелуі салыстырмалы түрде 28 пайызға төмендеді. «Эпидемиялық көрсеткіштер бойынша тапсырған сынамалар ішінде 279 науқастан COVID анықталған. Оның ішінде ЖРВИ/пневмония диагноздарымен 76 науқастан және 201 жағдай өзара қатынаста болғандар арасынан анықталып отыр. Профилактикалық мақсатта тапсырғандар ішінде 240 науқас анықталды, олар: мемлекеттік шекарадағы кеден бекеттерінен өту кезінде – 7, вахталық жұмысшылар арасынан – 167, әскерге шақыртылғандар – 3, жоспарлы және шұғыл жатқызу кезінде – 44, жүкті әйелдер арасынан – 11, ақылы түрде тексерілгендер арасынан 5 жағдай анықталған», дейді Н.Нышанов.
Облыс тұрғындарын ПТР әдісімен тексеру мақсатында 9 мемлекеттік зертхана жұмыс істеуде. Бүгінге дейін полимеразды тізбекті реакциясы әдісімен 469 426 адам тексеруден өткізілді, вирус анықталғаны – 4 196. Мамандар барлық жағдай веб-қосымшаға енгізіліп, бақылауға алынғанын айтады. Эпидемиялық ахуалдың тұрақты болуы әрбір азаматтың карантиндік талапты сақтауына байланысты екенін жұрт жақсы біледі. Бұл орайда тиісті мекемелер де «құдай сақтасын» деп бейғам жүретін жұртқа жиі ескерту жасап, талапты бұзғандарына тиісті шара қолдануда. Яғни «жасылда» қалудың жолы жалғыз – барлық карантин талаптарын сақтап, вакцина салдыру екені айтылуда.
Түркістан облысы
