Зарина Диас Аустралияның Мельбурн қаласында өтіп жатқан турнирдің үшінші кезеңінде тоқтады. Алғашқы айналымда дүниежүзілік рейтингте өзінен бір саты төмен тұрған (82-орын) америкалық Кристина Макхэйлді үш сетте 3:6, 6:3, 6:1 нәтижесімен жеңсе, екінші кезеңде әлемнің 96-ракеткасы румыниялық Ана Богданды үш сетте 6:4, 5:7, 6:2 есебімен қапы қалдырды. Өкінішке қарай, үшінші кезеңде әлемнің 20-ракеткасы, 2019 жылғы АҚШ ашық чемпионатының жеңімпазы канадалық Бьянка Андреескуден айласын асыра алмады. Бірінші партияда 1:6 есебімен ұтылған Диас жарысты әрі қарай жалғастырудан бас тартты.
Ал Италиядағы Бьелла челленджер турниріне қатысып жатқан Дмитрий Попко (170) алғашқы айналымда әлемнің 88-ші, осы доданың 2-ракеткасы америкалық Себастьян Кордамен күш сынасты. 1 сағат 10 минутқа созылған бәсекеде жерлесіміз 6:4, 6:3 есебімен екі партияда жеңіске жетті. Енді Д.Попко ширек финалға шығу үшін әлемнің 187-ракеткасы латвиялық Эрнест Гулбис немесе рейтингте 373-сатыдағы италиялық Рауль Бранкаччио жұбының жеңімпазымен кездеседі. Италиядағы дода 21 ақпанда аяқталады.
