Осы тұста мемлекет қол ұшын созып, әлеуметті қолдау қадамына барды. Нәтижесінде, бюджет қаржысына қашықтан оқуға қажетті жабдықтарды сатып алып, мұқтаж отбасылардың оқу жасындағы балаларына пайдалануға берді. Дәл осы бағытта Алматы облысына 12,3 млрд теңге қаржы бөлінген екен. Бұл қомақты қаражаттың 4 млрд теңгесі жергілікті бюджеттен бөлінсе, 8,3 млрд теңге қаржы республикалық қазынадан берілген. Яғни жетісулық оқушылардың толыққанды білім алуы үшін барлық жағдай жасалған. Мұқтаж оқушыларға 80 000 дана компьютер сатып алынып, уақытша пайдалануға берілген. Қазір 23,7 мың техникалық жабдық оқушылардың қолында жүр. Бұл іске ерікті демеушілер де жұмылған.
– Оқушылар мен колледж студенттерінің қашықтан білім алуына барлық жағдай жасадық. 80 мың компьютер сатып алу үшін 12,3 млрд теңге қаржы бөлінді. Барлығы 23,7 мың оқушыға компьютер уақытша қолдануға таратылды. Ал демеушілер көмегімен 2110 техника берілді, – дейді бұл жайында облыс әкімі Амандық Баталов.
Жалпы бүгінде 426 мыңнан астам жетісулық бала мектеп қабырғасында білім алуда. Оқумен қамтудағы кедергілерді жою мақсатында шалғай ауылдарда тұратын оқушыларды мектепке тасымалдап, оқыту үшін 70 жаңа автобус көлігі де алынған екен. Бұған 1 млрд теңге қаржы жұмсалыпты.
Өкінішке қарай, өңірде білім беруге бөлінген қыруар қаражатқа қол сұққан шенеуніктер де анықталған болатын. Жақында Жемқорлыққа қарсы күрес қызметі Алматы облыстық білім басқармасының басшысы Майгүл Омарова мен облыстық білім беру саласындағы ғылыми-тәжірибелік ақпараттық технологиялар орталығының директоры Арапби Менлыбаевты ұстады. Сонымен қатар, бұл істе Алматы облыстық білім басқармасының күрделі жөндеу және мемлекеттік сатып алу бөлімінің маманы Бақыт Абдолданованың есімі аталды. Олар қашықтан оқытуға қажетті 2 522 ноутбукты мемлекеттік сатып алу кезінде қызметтік өкілеттігін пайдаланып, жеке пайда көруді көздегені үшін айыпталуда. Сыбайласқан топ ымыраласу арқылы бірнеше жеке кәсіпкермен келісім жасап, жалпы сомасы 406 млн теңге бюджет қаржысын игерген. Бұл қызметі үшін лауазымды тұлға 37 650 000 теңге пара алу кезінде тұтылған болатын.
Айтпақшы, бірқатар ақпарат құралында Қапшағай қаласы білім бөлімінің басшысы Раиса Ешимованың бюджет қаржысын жымқыруға байланысты күдікке ілінгені жайында ақпараттар тарады. Яғни білім бөлімінің басшысына қатысты жария болған деректерде «Білімді дамыту-2020-2025» мемлекеттік бағдарламасы бойынша бөлінген қаражаттың 1 млн теңгесін мақсатсыз жұмсады деген күдікке алынуы мүмкін делінген болатын. Алайда қазір бөлім басшысы өзінің тікелей жұмысын жалғастыруда. Бұл ақпаратты Алматы облыстық білім басқармасының баспасөз қызметі растады. Басқарма өкілі Р.Ешимованың қызметтік міндетіне қатысты қандай да бір шешім қабылданбағанын, сондықтан ол бөлім басшысы ретіндегі қызметтік лауазымын жалғастырып жатқанын айтты.
