Білім • 18 Ақпан, 2021

Жазатайым оқиғалардан сақтап қалатын «ақылды» терезе жасап шығарылды

839 рет
көрсетілді
1 мин
оқу үшін

Ақтөбе қаласындағы Назарбаев зияткерлік мектебінің оқушылары Айкен Алтай және Айдана Кенжебаева «Savvy Window» жобасын сәтті аяқтап, баламасы жоқ өнертабысқа авторлық құқық алды. Көпқабатты үйлерде тұратын балалардың қауіпсіздігін қамтамасыз ететін терезеде арнайы механизм жасақталған, деп хабарлайды Egemen.kz

Жазатайым оқиғалардан сақтап қалатын «ақылды» терезе жасап шығарылды

«Терезеде орнатылған құрылғы 90 см аумақтағы қозғалысты сезеді. Бала терезеге жақындаған сайын ультрадыбыстық датчикетер іске қосылып, оны лезде жауып тастайды. Осылайша балақайлардың өмірін сақтап қалуға болады, ал терезені қайта ашу үшін матрицалық пернетақтаға құпия сан енгізу шарт», дейді жоба авторының бірі Айкен Алтай.

Әр елде байқалатын қауіпсіздік мәселесін арқау еткен зияткерлер жобаны информатика пәні мұғалімі Ақзат Қауысова және физика пәні мұғалімі Мират Оспановтың жетешілігімен жасады. Олардың айтуынша, «ақылды» терезе тек көпқабатты үйлерде ғана емес, мектеп және балабақша үшін де қолайлы.

«Жаз айы басталғанда балалардың терезеден құлап кету дерегі көп тіркеледі. Бір жылдан астам уақыт бұрын идеяны іске асыру жолын іздедік. Ал «ақылды» терезені бір айда жасадық. Дәл осы жоба елімізде жоқ. Оқушылар авторлық құқықты иеленді», деп бөлісті жоба жетекшілері.

Өнертапқыштар автоматтандырылған жүйелі жобаға алдағы уақытта толықтырулар енгізіп, патент алуды көздейді.