Аймақтар • 22 Ақпан, 2021

Індетке қарамастан ілгері жылжу бар

5 рет көрсетілді

Қарағанды облысының әкімі Жеңіс Қасымбек халық алдындағы жыл сайынғы дәстүрлі есебін биыл онлайн режімінде берді. Айта кету керек, есеп беру кездесуін облыстың барлық телеарнасы тікелей эфирде көрсетті. Сонымен бірге облыс әкімдігінің ресми аккаунты Instagram Akimat09, Saryarqa TV, YouTube-арнасы, еkaraganda.kz сайты да онлайн-есептен ақпарат таратты.

Облыс басшысының айтуынша, бір ай ішінде барлық деңгейдегі әкімдер тұрғындармен 423 кездесу өткізіпті. Оған 44 мыңға жуық адам қатысқан.

Атқарушы биліктің алдында тұрған маңызды міндеттің бірі – тұрғындарды жұмыспен қам­ту. Осы орайда өңір басшысы былтыр мемлекеттік бағ­дар­ла­малар арқылы облыста 35 мың жаңа жұмыс орны ашылғанын мәлім етті. Бұл жұмыссыздық деңгейін 4,6% көрсеткіш мұғдарында ұстап тұ­ру­ға мүмкіндік берген.

Онлайн-есептік кездесуде Жеңіс Қасымбек денсаулық сақ­тау саласын да­мы­­ту мәсе­ле­сі­не к­еңінен тоқталды.

– Өткен жылы Қарқаралы ауда­нының Қарағайлы кентінде және Нұра ауданының Шахтер ауылында жаңа ауылдық дәрігерлік амбулаториялар салынды. Абай және Шет аудандарында орталық аудандық ауруханалар жөнделді. Осы жылы Ақтоғай мен Нұрадағы орталық аудандық ауруханалар да осындай өзгерістерді күтіп отыр. Ақ­­­адыр кентіне жұмыс сапарымен барғанымда ақ­са­қалдар аурухана ғимаратын жөндеу тура­лы өтініш айтты. Биыл міндетті түр­де ол жұмысты бастаймыз, – деді ол.

Өңір басшысы онкологиялық дис­пан­сер­дің Жезқазғандағы фи­­лиалын ұйым­дастыру мәсе­ле­сін шешуге уәде берді. Сон­дай-ақ Қарағандыда ересектерге ар­­налған облыстық көп­ бейінді ауру­ха­на­ның, об­лыс­­тық онкологиялық дис­­пан­­­сер­дің операциялық-реа­ни­ма­ция­лық кор­пу­сының құры­лы­сы бастал­ға­нын атап өтті. Сәулелік диагностика және терапия орта­­­лы­ғы үшін ғимарат салу жоспарда бар. Ұзақ уақыт кі­д­ірістен кейін облыстық ба­ла­лар ауруханасының құрылысын аяқ­тау да кезек күттірмейтін мін­деттің бірі екенін тіл­ге тиек етті.

– Жиһазбен және қажетті тұр­мыстық техникамен жаб­дық­талған қызметтік пә­тер­лерді бе­ру есебінен дәрігерлер мен жас мамандарды тарту мәселесін шешеміз. Екі жыл ішінде 227 дәрігер баспанамен қамтылды. Алдағы екі жылда біздің облыс­­қа жұмыс істеуге келген кем деген­де 300 маман пәтер алады, – деді ол.

Жеңіс Қасымбек Қарағанды өңірінде жаңа оқу жылынан бастап мектептерде тегін тамақтанатын балалар саны артатынын мәлімдеді.

– Өткен жылғы есептік кез­де­­суде уәде еткендей, биыл­дан бастап барлық 1-2-сынып оқушыларын тегін ыстық та­мақ­пен қамтамасыз еттік. Енді қыркүйек айынан бастап 3-ші және 4-сыныптарды да қам­ти­тын боламыз, – деді облыс әкімі.

Былтыр облыста жаңа жаб­дық­тармен жарақ­тан­ды­рыл­ған 26 қосымша білім беру орталығы ашылды. Жаңа мектептер Жез­қаз­ғанда, Қарағандыда және Ұлы­тау ауданында салынды. Биыл Шет ауданының Киікті ауылында, Жезқазған қаласының Теректі стансасында, Жаңаарқа ауданының Жаңаарқа кентінде және Қарағандыда құрылысы жүріп жатқан төрт мектепті тапсыру жоспарда тұр.

Облыс басшысы үш жасқа дейінгі және ерекше қажет­ті­ліктері бар балаларды балабақ­ша­лармен қамтамасыз етудің басты міндет екенін айтты. Осы жыл аралығында 1500 орын­дық 15 жекеменшік мектепке дейінгі ұйым ашылыпты. Бұл үш жасқа дейінгі балаларды қамтуды 61%-ға дейін арттыруға мүмкіндік берген.

Ж.Қасымбек Қарағанды облысында турис­тер үшін жаңа демалыс орын­да­рының пайда болатынын мәлім етті. Мысалы, Балқаш курорттық аймағын да­мы­туға шамамен 30 млрд теңге жұм­салатынын айтты.

– Бізде үш туристік кластер бар. Олар­дың қатарына 50 өңірлік жоба тізімі­нің ондығына кі­ре­тін Балқаш, Қар­қа­ралы және Ұлытау бар. Жеке инвес­­ти­­циялар есебінен тоғыз жаңа де­ма­лыс аймағының құры­лысы бас­талады. Резервте жаға­лау ай­­мағындағы туристік инфра­құ­ры­­лым үшін тағы 60 га бос жер бар, – деді облыс әкімі.

Туристік саланың ая­сы Бал­қаш­та ғана емес, Қарқаралыда да кеңеюде. Мұндағы бес жеке демалыс аймағын ашу­ға 1 млрд теңгеден асатын ин­вес­­тиция салынбақшы. Ұлы­тау­да туристерге арналған визит-ор­та­лық­­тың құрылысы аяқ­талды. Ау­данда қасиетті орын­дар мен көрікті жерлердің жол­дары жөн­делуде. Биыл Жошы хан­ның тарихи-мәдени кешені­нің құ­ры­л­ы­сы аяқ­талуға тиіс.

Есептік кездесуде облыс әкі­мі өңір­де ауқымды құрылыс жұ­мыс­тарының жалғасатынын м­ә­лім­деді.­ Биыл кезекте тұр­­ған 3 мыңнан астам адам әлеу­меттік тұрғын үймен қамта­ма­сыз етілмекші. Бұдан бөлек әлеу­­меттік қорғалатын санат­­та­ғы кезекте тұрған 2 500 адам да баспаналы болған. Жеңіс Қасымбек әлеуметтік жалға бері­летін және несиелік тұрғын үй беру қарқыны бір жылда 40%-ға өскенін атап өтті.

Облыс әкімі Қарағанды облысында 2021 жылы 14 жаңа өндірісті іске қосып, 2 600 жұ­мыс орнын ашу жоспарда бар екенін айтты. Ал инвестиция көле­мі 700 млрд теңгеден асады де­ген болжам бар.

Жақын арада Жәйремдегі байы­ту фабрикасы, ферро­қорыт­па зауыты және Qaz Car­bon агломерациялық фабрикасы сияқты жобаларды жүзеге асыру жоспарда бар екен. Саран қала­сында қытайлық Yutong ком­паниясының қатысуымен авто­бустар мен арнайы техника шығаратын кәсіпорын іске қосылды және жақын арада шағын торапты құрастыру іске қосылатын болады. Сондай-ақ биыл ресейлік «Татнефть» компаниясының қатысуымен шина шығаратын зауыттың құрылысы басталатынынан хабардар етті облыс әкімі.

Қарағанды облысында биыл кәсіпкер­лік­ті қолдауды қар­жы­лан­дыру 2,5 есе өскен екен.

– 2020 жылы «Бизнестің жол картасы» бойынша жеңілдікті шарт­тармен облыстың 420 кә­сіп­орны өңір экономикасына 48 млрд теңге салып, өз жобаларын іске асыра алды. Бұл 2019 жылмен салыстырғанда екі есе көп. Биыл кәсіпкерлікті қол­дауға бюджеттен 7 млрд теңге қа­рас­ты­рылған. Ол өткен жыл­ғы­дан 2,5 есе артық, – деді облыс әкімі.

Шағын және орта бизнесті мем­лекеттік қолдау 2 400 тұ­рақ­ты жұмыс орнын құруға мүм­кін­дік берген. Бір жыл ішінде өз ісін ашуға 1900 өтеусіз грант беріліпті. Облыс әкімінің жүз грантын жас кәсіпкерлер алды. Сондай-ақ түрлі мемлекеттік бағ­дарламалар бойынша қаржы­лық қолдауды 3700 кәсіпкер пайда­ланған. Бизнеске тегін оқыту курс­тарынан 2 800 адам өтті.

Есеп беру кездесуінде спорт саласына айрықша көңіл бөлі­ніп отырғаны аталып өтті. Әсі­ресе ауылдағы спорт инфра­құ­ры­лы­мын дамытудың жіті назарда екендігі айтылды. Мысалы, бүгінде өңірде алты бірдей дене шынықтыру-сауықтыру кешенінің (ДШСК) құрылысы жүріп жатыр.

– 2020 жылы спорт нысандарын салуға және жөндеуге 11 млрд теңгеден астам қара­жат бөлінді. Қарқаралы мен Теміртауда жаңа дене шынық­ты­ру-са­уық­ты­ру кешендері ашыл­ды. Биыл тағы алтауын қалаларда ғана емес, шалғай ауыл­дарда да салып жатырмыз, – деді облыс әкімі.

Бүгінде Қарқаралы ауданын­да­ғы Егін­ді­­бұлақ кентінде «Ауыл – ел бесігі» арна­йы жо­ба­сы аясында 100 орындық ДСК құрылысы басталып, келесі жылы аяқталады. Бұл мәсе­лені кент тұрғындары көп­тен бері көтеріп келген еді.

Сондай-ақ Ұлытау ауда­нын­дағы Қар­сақбай кентінде жүр­гізіліп жатқан ДСК құры­лы­сы да аяқталуға жақын. Бұл нысан­ның құрылысы «Жұ­мыс­пен қам­ту­дың жол картасы» бағдарламасы бойынша қар­жы­ландырылды. Сәтін салса, құры­лысы был­тыр басталған кешен биыл ашылады деп жос­пар­лан­ған.

Сонымен қатар облыс бас­шы­­сы есеп­­тік кездесуде алда­ғы екі жылда жаңа спорт нысандары ашылатынын мәлім етті. Атап айтқанда, Шахтинск қаласында, Ұлытау ауданының Жезді ауылында, Бұқар жырау ауданының Ботақара кен­тін­де дене шынықтыру-сауықтыру кешен­де­рінің құрылысы биыл аяқталады. Ал Жезқазғандағы ДШСК құрылысын бітіру келесі жылдың еншісінде.

Есептік кездесуде облыс әкімі бұ­қара­лық спортты дамытудың не­гізгі инди­ка­­торының бірі ха­лық­ты қолжетімді спорт­­­­тық инфра­құрылыммен қамтамасыз ету екендігін атап өтті. Бүгінде об­лыста жа­санды жабындысы бар 333 спорт алаңы, 262 көп ­са­лалы хоккей корты және 34 стрит-воркаут алаңы бар екен­ді­гі айтылды. Сондай-ақ биыл Нұра мен Жа­ңаар­қа­да 2 жүзу бассейнін тапсыру жоспарда бар.

Сонымен бірге өңір басшысы облыс­та­ғы спорт нысандарын салуға қаражат бюд­­жет­тен ғана емес, демеушілер есе­бі­нен де қарастырылғанын атап өтті.

Облыс әкімінің онлайн-есеп беруі ке­зін­де тұрғындардан мың­­ға жуық сұ­рақ ке­ліп түс­кен. Ж.Қасымбек бұл сұрақ­­­­­­­­­тар­дың бір де біреуі назардан тыс қал­май­ты­нына, тиісті жауабы болатынына уәде берді.

 

ҚАРАҒАНДЫ

Соңғы жаңалықтар

Ұқсас жаңалықтар